Оқыс оқиға 13 тамыз күні Степногорск қаласында болған. №4 бағдардағы автобустың қозғалтқыш бөлігінен шыққан өрт лезде салонға тарай бастаған. Қуанышқа орай, ішінде болған барлық 10 жолаушы дер кезінде далаға шығып үлгерді.
Қоғамдық көлікке орнатылған газ баллон жабдығы айналаға үлкен қауіп төндірді. Оқиға орнына жеткен өрт сөндірушілер жарылыстың алдын алу үшін бірінші кезекте баллондарды суытып, содан кейін ғана қызыл жалынды толық сөндірді.
Өрттің жалпы аумағы шамамен 10 шаршы метрді құрады. Зардап шеккендер мен қаза тапқандар жоқ. Қазіргі кезде өрттің шығу себебі анықталып жатыр.
