Тоқаев Қырғызстанның Шанхай ынтымақтастық ұйымына төрағалық қызметіне жоғары баға берді. Оның айтуынша, қырғыз тарапы мазмұнды күн тәртібін қалыптастырып, қатысушы мемлекеттердің ұсыныстарын «Орнықты бейбітшілікке, дамуға және өркендеуге бірге қадам басайық» ұраны аясында біріктірді.
«Бішкек саммитінің қорытындысы ортақ мақсаттарға қол жеткізуге тың серпін беріп, ШЫҰ-ның Еуразия кеңістігіндегі тұрақтылықты қамтамасыз ететін негізгі тіректердің бірі ретіндегі орнын нығайтатынына сенімдімін», — деді Президент.
Тоқаев өзара жауапкершілікке, бірлескен дамуға және ұзақ мерзімді ынтымақтастыққа негізделген әлемдік тәртіп қалыптастыруды ортақ стратегиялық міндет деп атады. Ол ШЫҰ-ның негізгі қағидаттарын Бейбітшілік жолындағы көпжақтылық және дипломатия халықаралық күніне орай БҰҰ Бас Ассамблеясының арнайы қарарында бекітуді ұсынды.
Президент Қазақстандағы саяси және экономикалық өзгерістер туралы да айтты. Оның сөзінше, 1 шілдеде күшіне енген жаңа Конституция мемлекеттік биліктің жаңартылған жүйесін қалыптастырып, елдің орнықты дамуына негіз қалады. Мемлекет басшысы жаңа бір палаталы заң шығарушы орган — Құрылтайдың жұмысын бастағанын еске салды.
Тоқаев саммитке қатысушыларға сайлаудың өтуіне байланысты жолдаған құттықтаулары үшін алғыс айтып, Қазақстанның теңгерімді, сындарлы және бейбіт сыртқы саяси бағытты ұстанатынын растады.
Мемлекет басшысы Біріккен Ұлттар Ұйымын одан әрі дамыту мәселесіне ерекше назар аударды. Оның пікірінше, айтылып жүрген сынға қарамастан, БҰҰ-ға балама жоқ.
«Біріккен Ұлттар Ұйымы халықаралық жүйенің өзегі, ал оның Жарғысы халықаралық құқықтың әмбебап негізі болып қалуға тиіс», — деді Қасым-Жомарт Тоқаев.
Президент БҰҰ Бас хатшысы Антониу Гутерриш бастаған реформаларды қолдады. Ол түрлі күш орталықтары арасында диалог орнатуға және ұжымдық шешімдер әзірлеуге ықпал ете алатын жауапты орта державалардың рөлі артып келе жатқанын да атап өтті.
Сөз барысында превентивті дипломатия мәселесі де көтерілді. Тоқаев жанжалдардың алдын алу және дауларды бейбіт жолмен шешу мәдениетін дамыту қажет екенін айтты. Осы орайда ол Қазақстанның шілде айында Қытай бастамасын қолдап, Медиация жөніндегі халықаралық ұйымды құру туралы конвенцияға қосылғанын еске салды.
Жасанды интеллект туралы айтқан Президент оның жасампаз әлеуетін пайдалануға, технологиялардың бақылаусыз қолданылуына жол бермеуге және цифрлық теңсіздікті азайтуға мүмкіндік беретін әмбебап ережелер әзірлеуге шақырды.
Тоқаев Қазақстанның бастамасымен Алматыда БҰҰ ЭСКАТО-сының Азия-Тынық мұхиты цифрлық шешімдер орталығы құрылатынын хабарлады. Орталық, ең алдымен, дамушы мемлекеттердің мүддесі үшін озық тәжірибені таратуға бағытталады.
Мемлекет басшысы су қауіпсіздігін әлемдік күн тәртібіндегі негізгі басымдықтардың бірі деп атады. Қазақстан күш-жігерді үйлестіру, тұрақты үкіметаралық диалог жүргізу, ресурстар тарту және келісілген шешімдер әзірлеу үшін БҰҰ аясында Халықаралық су ұйымын құруды ұсынды.
Бұл бастаманы өңірлік деңгейде ШЫҰ-ның Су проблемаларын талдау орталығы толықтыра алады. Тоқаев ұйымға мүше мемлекеттерді екі құрылымды да құруды қолдауға шақырды.
Сөз соңында Президент ШЫҰ-ның Еуразия елдерінің ұзақ мерзімді дамуына ықпал етуге қажетті мүмкіндіктері бар екенін атап өтті. Оның айтуынша, Қазақстан қауіпсіз әрі орнықты әлемдік тәртіп қалыптастыру үшін серіктес мемлекеттермен сындарлы ықпалдастықты жалғастырады.
