Қазақстанда eGov GPT мүмкіндіктерін кеңейту жұмыстары жалғасып жатыр. Үкімет отырысында Премьер-министрдің орынбасары – Жасанды интеллект және цифрлық даму министрі Жаслан Мәдиев сервистің даму барысы туралы айтып берді.
SHYNDYK.KZ хабарлағандай, цифрлық ассистент сәуір айында іске қосылған болатын. Қазір оның көмегімен халық арасында ең көп сұранысқа ие 50 мемлекеттік қызметті алуға болады. Бұл азаматтардың барлық өтініштерінің шамамен 30 пайызын құрайды.
Жүйенің басты ерекшелігі мен болашағы
Жыл соңына дейін билік бұл көрсеткішті 70 пайызға дейін арттыруды көздеп отыр. Болашақта eGov GPT мемлекеттік қызметтерге қатысты мәселелердің басым бөлігін шешуге мүмкіндік беретін бірыңғай цифрлық көмекшіге айналуы тиіс.
Сервистің басты ерекшелігі – пайдаланушыға қандай қызметті таңдау керектігін және оған қандай құжаттар қажет екенін өзі іздеп әуре болудың қажеті жоқ. Тек өз жағдайын сипаттап жазса жеткілікті, содан кейін жүйе әрі қарай не істеу керектігін өзі нұсқап, қажетті қызметті алуға көмектеседі.
Жаслан Мәдиевтің айтуынша, қазақстандықтар eGov GPT қызметін осыған дейін 150 мыңнан астам рет пайдаланған. Үкімет жасанды интеллектіні одан әрі кеңінен енгізу артық әрекеттерді жойып, мемлекеттік қызметтерді алуды әлдеқайда жеңіл әрі жылдам етеді деп күтіп отыр.
