Ресми мәліметтерге сәйкес, өткен жылы көрсетілген 215 миллион медициналық қызметтің 88 пайызы немесе 190,8 миллионы толықтай электронды форматта ұсынылған. Бүгінгі таңда медициналық анықтамалардың 12 түрі цифрландырылып, оның бесеуі тек онлайн режимде ресімделеді. Бір жыл ішінде азаматтарға 8,5 миллионнан астам электронды анықтама берілді, бұл өткен жылғы көрсеткіштен 2,2 есе артық.
Деректер қорын біріктіру және бірыңғай цифрлық басқару платформасын іске қосу арқылы медицина қызметкерлерінің әкімшілік жүктемесі 30–40 пайызға төмендеді. Жүйе еліміздегі 21,3 мыңнан астам медициналық ұйымды, 275 мың қызметкерді және 141 мыңнан астам техника бірлігін біріктірді. Процестерді автоматтандыру сонымен қатар 10,6 миллиард теңге көлеміндегі негізсіз шығындардың алдын алуға және лицензиядан кейінгі превентивті бақылауды іске қосуға мүмкіндік берді.
Науқастар үшін де қолайлы цифрлық сервис түрлері көбейді. Бір жыл ішінде 5,6 миллион азамат дәрігер қабылдауына онлайн режимінде жазылған. Кезектерді басқарудың жаңа тетіктері диагностика күту мерзімін едәуір қысқартты – атап айтқанда, ПЭТ/КТ тексеруін күту уақыты үш айдан екі аптаға дейін азайды. Сонымен қатар, бүгінде 7 миллион бала мен 4,3 миллион әйел цифрлық денсаулық мониторингімен қамтылған.
