«The Finiko» қаржы пирамидасының басшысы 2022 жылдан бері халықаралық іздеуде болған. Ол Түркиядан Қазақстанға экстрадицияланды. Арнайы операция Қаржылық мониторинг агенттігінің Алматы қаласы бойынша департаменті мен Интерполдың Ұлттық орталық бюросы прокуратура органдарының үйлестіруімен жүргізілді.
ҚМА мәліметінше, «The Finiko» нақты кәсіпкерлік немесе инвестициялық қызметпен айналыспаған. Жаңа салымшылардан түскен қаражат бұрын қатысқан адамдарға төлем жасауға жұмсалып отырған. Осылайша жоба табыс әкеліп отырғандай көрініп, жаңа салымшыларды тартуға мүмкіндік берген.
Тергеу нұсқасы бойынша, күдіктінің әрекеті салдарынан салымшылардан 160 млн теңгеден астам қаражат тартылған. Сонымен қатар сотқа дейінгі тәркілеу аясында күдіктіге тиесілі құны 221 млн теңге болатын жер учаскесі мемлекет кірісіне өткізілді.
Бұған дейін осы қылмыстық іс бойынша үш адам сотталған. Оларға мүлкін тәркілей отырып, алты жылға дейін бас бостандығынан айыру жазасы тағайындалған.
Қылмыстық істі тергеу жалғасып жатыр. ҚМА хабарлауынша, Қылмыстық-процестік кодекстің 201-бабына сәйкес, қылмыстық іске қатысты өзге ақпарат әзірге жарияланбайды.
