Алматының Наурызбай ауданындағы «Тау Самал» тұрғын үй кешенінде 111 таунхаус иесі ортақ мүлікті басқару құқығына қатысты мәселе көтерді. Тұрғындар бейнеүндеу жариялап, құзырлы мемлекеттік органдардан жағдайға араласуды сұрады.
Тұрғындардың айтуынша, 2009–2013 жылдары құрылыс компаниялары кешеннің ортақ инфрақұрылымын тұтыну кооперативіне басқару және күтіп ұстау үшін берген. Алайда меншік иелері бұл мүлік кооперативке емес, тұрғындардың өздеріне тиесілі екенін алға тартады.
Үндеу авторлары 2011, 2015 және 2016 жылдары қабылданған сот шешімдері олардың меншік құқығын растайтынын мәлімдеді. Дегенмен тұрғындардың сөзінше, аталған шешімдер әлі күнге дейін орындалмаған. Ал 2018 жылы кооператив жарғысына өзгерістер енгізілгеннен кейін №201–229 үйлердің иелері оның құрамына кіру мүмкіндігінен айырылған.
Тұрғындардың мәліметінше, кешенде шамамен 380 жылжымайтын мүлік иесі бар. Соған қарамастан кооператив жиналыстарына оннан аспайтын адам қатысады. Осыған байланысты олар қажетті кворумның сақталуына және қабылданған шешімдердің заңдылығына күмән келтіреді.
Меншік иелері кооперативке мүшелікке қабылдауға қатысты шектеулерді қайта қарауды, дауыс беру және ортақ мүлікті басқаруға қатысу құқықтарын қамтамасыз етуді талап етіп отыр. Олар прокуратура мен басқа да уәкілетті органдарға жүгініп, айтылған жайттарды тексеруді, кооператив әрекеттеріне құқықтық баға беруді және өз құқықтарын қорғау үшін шара қабылдауды сұрады.
