Қазақстанда 2027–2029 жылдарға арналған республикалық бюджет жобасы әзірленді. Құжатта 2027 жылғы 1 қаңтардан бастап бірқатар әлеуметтік көрсеткішті арттыру ұсынылған.
Жобаға сәйкес:
- ең төменгі жалақы — 85 000 теңге. Бұл көрсеткіш өзгермейді;
- АЕК — 4 693 теңге. 2026 жылы 4 325 теңге;
- ең төменгі базалық зейнетақы — 38 622 теңге. Қазір 35 596 теңге;
- ең төменгі зейнетақы — 74 919 теңге. 2026 жылы 69 049 теңге;
- күнкөріс минимумы — 55 173 теңге. Қазір 50 851 теңге.
Сонымен қатар жасына және еңбек сіңірген жылдарына байланысты зейнетақы төлемдерін 2027 жылғы 1 қаңтардан бастап 8,5%-ға арттыру жоспарланып отыр.
Міндетті әлеуметтік медициналық сақтандыру (МӘМС) жүйесіне мемлекет төлейтін жарна мөлшері де өседі. Оны жарна есептеу объектісінің 2,2%-ына дейін жеткізу ұсынылған.
«2027–2029 жылдарға арналған республикалық бюджет туралы» заң жобасы қазір қоғамдық талқылаудан өтіп жатыр. Құжат бойынша ұсыныстарды 5 қыркүйекке дейін жолдауға болады.
Айта кетейік, бұл көрсеткіштер әзірге жоба ретінде ұсынылып отыр.
