Жеке меншікті қорғау, ережелердің тұрақтылығы және шикізат экспортынан терең өңдеуге көшу кәсіпкерлер саясатының негізіне айналуы тиіс. Бұл туралы «Әділет» партиясының төрағасы Айбек Дадебай Алматыда өткен республикалық кәсіпкерлер форумында мәлімдеді, деп хабарлайды SHYNDYK.KZ.
Жиынға елдің әр өңірінен келген 800-ден астам кәсіпорын басшысы, инвесторлар және салалық бірлестіктердің өкілдері қатысты. Олардың арасында “Qarmet”, «Ембімұнайгаз», «Маңғыстаумұнайгаз», KAZ Minerals, «СНПС-Ақтөбемұнайгаз», Astana Motors, «Казфосфат», ERG сияқты ірі компаниялар бар. Жалпы алғанда, форумда ұсынылған кәсіпорындарда шамамен 800 мың қазақстандық еңбек етіп жатыр. «Әділет» өзінің сайлауалды бағдарламасының басты мақсаттарының бірі ретінде экономикадағы орта бизнестің үлесін қазіргі 7%-дан 20%-ға жеткізуді көздеп отыр. Ол үшін партия жаппай субсидиялаудан бас тартып, өндірісін кеңейтіп, инновация енгізетін және жұмыс орындарын ашатын компанияларды қолдауды ұсынады.
Сондай-ақ бізді бір күнде онлайн тіркеу, кәсіпорынды жабуды жеңілдету, жасанды интеллект көмегімен заңдарды түгендеу және реттеушілік тұрақтылық қағидатын бекіту жоспарланған.
«Кәсіпкерлігі мықты емес елдің мемлекеті де мықты болмайды. Біздің мақсатымыз – экономикадағы орта бизнестің үлесін 7 пайыздан 20 пайызға дейін жеткізу. Бүгінде шағын бизнес тексерістер мен салық салмағынан қорыққандықтан өскісі келмейді. Біз бизнестің кеңеюі, инвестиция құюы және сыртқы нарыққа шығуы үшін қауіпсіз әрі тиімді жағдай жасаймыз», – деді Айбек Дадебай.
Бағдарламаның жеке блогы кәсіпкерлерді қорғауға арналған. Партия экономикалық дауларды азаматтық-құқықтық алаңда шешуді, ал жоспардан тыс тексерістерді, жұмысты тоқтата тұру мен шоттарды бұғаттауды қатаң сот және прокурорлық бақылауға алуды ұсынады.
Қаржы мәселесін шешу үшін «Әділет» артық кепілсіз берілетін кредит кепілдіктерін кеңейтуді, венчурлық капиталды дамытуды, факторингке берілетін салық жеңілдіктерін қайтаруды және салық режимдері арасындағы өту кезеңін жеңілдетуді көздеп отыр.
Бағдарламаның тағы бір басымдығы – шикізатқа тәуелділіктен арылып, іште терең өңдеуді дамыту. Айбек Дадебай бұған мысал ретінде Astana Motors пен ERG компанияларының алюминий дискілерін бірлесіп шығару жөніндегі уағдаластығын атап өтті. ERG Директорлар кеңесінің мүшесі Шахмурат Муталип ірі жер қойнауын пайдаланушылар отандық өндірушілер офтейк-контрактілер арқылы кепілді өткізу нарығына сүйеніп жаңа қуаттарға инвестиция сала алуы үшін өздерінің ұзақ мерзімді қажеттіліктерін алдын ала ашып көрсетуі тиіс екенін айтты.
«Әділет» ішкі кооперацияны дамыту, жеке капиталды қорғау және мемлекеттің бәсекелес салалардағы қатысуын азайту арқылы Қазақстанда тұрақты орта бизнес класын қалыптастыруға болатынына сенімді.
