Премьер-министрдің орынбасары – Мәдениет және ақпарат министрі Аида Балаева отандастарымызды 12 тамызда аталып өтетін Халықаралық жастар күнімен арнайы құттықтады.
Осы орайда SHYNDYK.KZ редакциясы назар аударғандай, министр өз үндеуінде бүгінгі жас қазақстандықтардың ел өміріне етене араласып, үлкен істердің басы-қасында жүргенін ерекше атап өтті. Олар кәсіпкерлікті дамытып, заманауи технологияларды меңгерумен қатар, ғылым мен волонтерлікке ден қойып, ауқымды қоғамдық бастамаларды сәтті жүзеге асыруда.
Аида Балаеваның айтуынша, жаңа буынның Қазақстанды цифрлық трансформациялау ісіне үлес қосуы айрықша маңызға ие. Өйткені алдағы жылдары еліміздің даму бағытын айқындайтын жасанды интеллектіні игеру, технологиялық жобалар жасап, тың шешімдер ұсыну – дәл осы білімпаз жас мамандардың еншісіндегі жауапты міндет.
Өз кезегінде мемлекет те бұл бағыттағы жұмыстарды тоқтатпай, жастардың сапалы білім алуына, жұмысқа орналасуына, баспаналы болуына және өз жобаларын іске асыруына барынша кең мүмкіндіктер жасауды жалғастыра береді. Сөзінің соңында ведомство басшысы жалынды жастарға өз күштеріне деген сенім, жаңа белестер мен барлық бастамаларына толағай табыс тіледі.
