Ақтауда кәмелетке толмаған балаға жасалған шабуыл зерттелуде. Туыстарының айтуынша, оны екі жасөспірім аяусыз сабаған. Оқиға әлеуметтік желіде видео тарағаннан кейін қоғамда үлкен резонанс тудырды.
Зардап шеккен баланың әпкесінің айтуынша, таңертең інісі дүкенге шыққан, сол кезде оны 16-17 жастағы екі жасөспірім тоқтатқан. Оның сөзінше, олар інісінен досына қоңырау шалып, оның үйден шығуын талап еткен. Жасөспірім бас тартқан кезде, шабуылдаушылар оқушыны соққыға жығып, болған жағдайды телефонға түсіріп алған. Содан кейін олар видеоны оның досына жіберіп, «егер ол шықпаса, оның да күні осылай болады» деп қорқытқан.
Шабуылдан кейін оқушы ауруханаға жеткізілді. Туысының айтуынша, оған медициналық тексеру жүргізіліп, содан кейін шұғыл түрде ауруханаға жатқызылған.
Маңғыстау облысының Полиция департаменті аталған факті бойынша адамдар тобы жасаған бұзақылық бабымен қылмыстық іс қозғалғанын хабарлады.
Жанжалдың барлық қатысушылары анықталып, заңды өкілдерімен бірге полиция бөлімшесіне жеткізілді. Қазіргі уақытта қажетті тергеу амалдары жүргізілуде.
Бұдан бөлек, кәмелетке толмағандардың заңды өкілдері бала тәрбиесі жөніндегі міндеттерін тиісінше орындамағаны үшін жауапкершілікке тартылды. Сондай-ақ, тиісті шаралар қабылдау үшін материалдар кәмелетке толмағандар істері жөніндегі комиссияға жолданды.
