Әлемдік футболдың ең ірі үш конфедерациясы халықаралық спортты басқарудың қазіргі жүйесін түбегейлі өзгертуге бағытталған бірлескен тұжырымдама әзірлеуге кірісті.
SHYNDYK.KZ хабарлағандай, тараптар арасындағы текетірестің басты себебі – ФИФА басшылығының, атап айтқанда, ұйым президенті Джанни Инфантиноның Әлем чемпионатына арналған коммерциялық құқықтардың 21 пайызын сату жоспары болды. Конфедерация өкілдері бұл шешімге қарсы шығып, тәуелсіз аудит жүргізуді талап еткенімен, олардың талабы жауапсыз қалған.
Осыған байланысты УЕФА, КОНКАКАФ және АФК өздерінің жеке құжатын дайындауға бел буды. Онда әлемдік футболды басқарудың жаңа құрылымы, маңызды шешімдер қабылдау тетіктері және ФИФА-ның шамамен 5 миллиард долларға бағаланатын қаржылық резервтерін жұмсау қағидалары айқындалады деп күтілуде.
Түйіні шешілмеген бұл мәселе келесі жылы одан әрі шиеленісе түсуі мүмкін. Егер ФИФА-ның қазіргі басшылығымен ымыраға келу мүмкін болмаса, дайындалған тұжырымдама президенттік сайлауда Инфантиноға бәсекелес болатын жаңа кандидатқа ұсынылуы ықтимал.
Bұдан да түбегейлі сценарий ретінде жаңа модель негізінде ФИФА-дан мүлдем тәуелсіз футбол құрылымын құру нұсқасы қарастырылып жатыр. Қазірдің өзінде бұл текетірес ішкі талқылаулар шеңберінен шығып кетті. Жанжал салдарынан УЕФА 20 жасқа дейінгі қыздар арасындағы Әлем чемпионатына бойкот жариялау ниетінен айнымай отыр. Еуропалық футбол басшылары алдағы соңғы қадамдарын Зальцбургтегі кездесуде жан-жақты талқылайды деп күтілуде.
Егер ірі конфедерациялар мен ФИФА арасындағы келіспеушіліктер осылай ушыға берсе, бұл қайшылық соңғы жылдардағы әлемдік футболды басқару жүйесі үшін ең ауыр сындардың біріне айналуы әбден мүмкін.
