Қазақстан құрамасы VI Дүниежүзілік көшпенділер ойындарындағы алғашқы алтын медальдарына қол жеткізді. Екі жүлдені де спортшылар аударыспақтан иеленді, деп хабарлайды SHYNDYK.KZ.
Нұрталап Керім 60 келіге дейінгі салмақ дәрежесінде чемпион атанды. Ол финалда Қырғызстан өкілін жеңді. Қазақстан қоржынына екінші алтынды Сайлау Мұхамеджан салды. 70 келіге дейінгі салмақ дәрежесіндегі шешуші белдесуде ол да қырғызстандық спортшымен кездесіп, 2:1 есебімен жеңіске жетті.
Аударыспақ — спортшылар ат үстінде күш сынасатын дәстүрлі сайыс түрі. Жеңіске жету үшін қатысушыларға физикалық күшпен қатар жақсы үйлесім, жылдамдық пен төзімділік қажет.
VI Дүниежүзілік көшпенділер ойындары Қырғызстанда 31 тамыз бен 6 қыркүйек аралығында өтеді. Биыл жарысқа 112 елден 3 мыңға жуық спортшы қатысып жатыр. Бағдарламаға ат спорты мен ұлттық ойындар, садақ ату, күш және зияткерлік сайыстарды қоса алғанда, 43 спорт түрі енгізілген.
