Алматыдағы №7 қалалық клиникалық аурухананың дәрігерлері тоғызыншы қабат биіктігінен құлап, өмірмен үйлеспейтін ауыр жарақат алған әйелді аман алып қалды.
SHYNDYK.KZ хабарлағандай, науқас ауруханаға комаға түскен және травматикалық шок жағдайында жеткізілген. Медициналық тексеру барысында оның бас сүйегі мен миы, кеуде қуысы зақымданып, қабырғалары, жамбас, ортан жілік және иық сүйектері сынып кеткені анықталды. Оған қоса, бұл жағдай пневмоторакс пен гемоторакспен күрделене түскен еді.
Әйелдің өмірі үшін бірнеше бағыттағы мамандар тобы жұмыла күресті. Емдеу ісіне реаниматологтар, травматологтар, нейрохирургтар, хирургтар және өзге де білікті дәрігерлер бірден жұмылдырылды. Науқасқа қатарынан бірнеше күрделі ота жасалып, қауіпті асқынулардың алдын алу мақсатында одан арғы ем үнемі қатаң бақылауда болды.
Политравма бөлімшесінің меңгерушісі Рамазан Аскеровтың айтуынша, науқас өміріне төнген ең үлкен қауіп тромбоэмболия мен май эмболиясы болған. Дегенмен, мамандардың бірлескен қажырлы еңбегі мен дұрыс таңдалған емдеу тәсілінің арқасында оң нәтижеге қол жеткізілді. Осыншама көптеген ауыр жарақаттарға қарамастан, науқас өте тез сауығып, дәрігерлер оны жетінші күні-ақ аяққа тұрғызды.
Оныншы күні емделуші ауруханадан үйіне шығарылды. Енді ол одан арғы емі мен оңалту шараларын амбулаторлық жағдайда жалғастыратын болады.
