Жаңа оқу жылы қарсаңында ата-аналарға мектеп сөмкесінің сыртқы келбеті мен сыйымдылығына ғана емес, оның бала денсаулығына тигізер әсеріне де баса назар аударуға кеңес беріледі. Сөмкенің ыңғайлы болуы және оқушының арқасы мен иығына түсетін салмақтың дұрыс реттелуі әлдеқайда маңыздырақ.
SHYNDYK.KZ хабарлағандай, мамандар әр жастағы баланың күнделікті көтеріп жүретін оқулықтары мен құрал-жабдықтарының салмағына қатысты арнайы ұсынымдар әзірлеген. Мәселен, 1-3 сынып оқушылары үшін бұл көрсеткіш 2 келіге дейін болса, 4-5 сыныптар үшін 2,5 келіден аспауы шарт. Ал 6-7 сынып оқушыларына 3,5 келіге дейін, 8-11 сыныптың жоғары сынып оқушыларына 4,5 келіге дейінгі салмақты көтеруге рұқсат етіледі. Айта кетерлігі, бұл нормаға бос сөмкенің өз салмағы кірмейді.
Ата-аналар үшін бұдан да қарапайым есептеу тәсілі бар. Баланың барлық заттары салынған сөмкенің салмағы оның өз салмағының 10 пайызы көлемінде болғаны абзал. Мысалы, егер оқушының салмағы 30 келі болса, оның арқалап жүрген сөмкесі 3 келі немесе одан да жеңіл болуы керек.
Бос сөмкенің өзін таңдағанда барынша жеңіл, яғни салмағы бір келіден аспайтын нұсқаларына тоқталған жөн. Сондай-ақ оның баулары жалпақ әрі жұмсақ, арқа тұсы қалың болуы және ұзындығын реттеу мүмкіндігінің қарастырылғаны маңызды. Бұған қоса, сөмкеде жарық шағылыстыратын элементтердің болуы және материалының су өткізбейтін, оңай тазаланатын матадан тігілуі құпталады.
Мектеп сөмкесін баламен бірге барып, міндетті түрде арқасына тағып көріп алған дұрыс. Ол тым үлкен болмауы, арқада салбырап тұрмауы немесе белден тым төмен түсіп кетпеуі қажет.
Медицина мамандары сөмкенің ішіндегі заттарды үнемі тексеріп отыруға кеңес береді. Өйткені ойыншықтар, сол күні қажет емес оқулықтар мен артық дәптерлер байқатпай салмақ қосады. Тағы бір қарапайым қағида – сөмкені екі иыққа бірдей асу. Бұл салмақтың арқаға біркелкі түсуін қамтамасыз етеді. Егер мектепте кейбір оқулықтар мен құралдарды сыныпта қалдыруға рұқсат етілсе, бұл мүмкіндікті де міндетті түрде пайдаланған жөн.
Жалпы үйден шығар алдында бірнеше минут уақыт бөліп, артық заттарды алып тастап, сөмке бауларын тексеріп, қажет болса оны өлшеп тұру бала денсаулығын сақтауға үлкен септігін тигізеді.
