Франция президенті Эммануэль Макрон елдегі жаппай наразылықтарға байланысты халыққа бейнеүндеу жасады. Ол билік азаматтардың талаптарын ескеруге тиіс екенін айтып, тәртіпсіздік ұйымдастырып, өзгенің мүлкіне зиян келтіргендер жауапқа тартылатынын мәлімдеді.
Сегіз минутқа созылған үндеуінде Макрон үкіметке халық наразылығының себептерін анықтап, қордаланған мәселелерді шешу жолдарын қарастыруды тапсырды. Наразылыққа түрткі болған себептердің бірі — жанармай бағасының қымбаттауы. Президент Таяу Шығыстағы соғыстың да елдегі жағдайға ықпал еткенін атап өтті.
Франция басшысы азаматтардың бейбіт шеруге шығу құқығы сақталуы қажет екенін жеткізді. Алайда бұл құқық ғимараттарды қиратуға, дүкендерді тонауға немесе өзгенің мүлкін бүлдіруге негіз бола алмайтынын ескертті. Оның айтуынша, заң бұзғандар келтірілген шығынды өтеуге міндетті, ал бейбіт шеруге қатысушылар тәртіп бұзушылардың әрекеті үшін жауап бермеуі тиіс.
Жаңа тәртіпсіздіктердің алдын алу үшін жергілікті билікке бұқаралық жиындарға шектеу қоюға және мемлекеттік ғимараттар мен кәсіпорындардың қауіпсіздігін күшейтуге мүмкіндік берілмек. Премьер-министр Себастьен Лекорню наразылық кезінде зардап шеккен кәсіпкерлерге қолдау көрсету мәселесімен айналысатын дағдарыс штабын басқарады.
Сонымен қатар үкімет басшысы саяси партиялардың өкілдерімен келіссөз жүргізеді. Университеттер, кәсіподақтар мен жұмыс берушілердің өкілдері де талқылауға шақырылмақ. Билік наразылық білдірушілердің талаптарын тыңдап, дағдарыстан шығу жолдарын қарастыруды жоспарлап отыр.
