25 тамыздан бастап Қазақстанда 65 жастан асқан жүргізушілердің міндетті медициналық тексеруден өтуін бақылау тәртібі өзгереді. Бұл ретте талаптың өзі жаңа емес, оның қолданыста болғанына он жылдан асқанын ІІМ ресми өкілі Шыңғыс Әлекешев мәлімдегенін SHYNDYK.KZ хабарлайды.
Оның айтуынша, жаңашылдық тек бақылау механизміне қатысты. Егер жүргізуші міндетті медосмотрдан уақытында өтпесе, оның куәлігінің қолданылуы автоматты түрде уақытша тоқтатылуы мүмкін. Тексеруден өткеннен кейін құжат қайта күшіне енеді. Мұнда жүргізуші куәлігінен айыру туралы сөз болып отырған жоқ.
Сондай-ақ ІІМ биыл 65 жасқа толғандардың бірден тексеруден өтуі талап етілмейтінін түсіндірді. Алғашқы міндетті медосмотрды 67 жаста өту қажет, кейін тексеру екі жылда бір рет жүргізіледі — 69, 71 жаста және ары қарай да сол сияқты. Сондықтан емханаларда босқа кезекке тұрудың қажеті жоқ.
Медосмотрдан мұндай тексеру жүргізуге құқығы бар кез келген мемлекеттік немесе жеке медициналық ұйымда өтуге болады. Егер тексеру туралы ақпарат базада әлі көріне қоймаса, жүргізушіге полиция қызметкеріне қағаз түріндегі медициналық анықтаманы көрсету жеткілікті — кейін деректер жүйеге енгізіледі.
Бұдан бөлек, ІІМ айыппұлдар туралы тарап жатқан сыбыстарды жоққа шығарды. Заңда медосмотрдан өтпегені үшін бөлек әкімшілік жауапкершілік көзделмеген. Құзырлы орган өкілдері өзгерістер күшіне енген алғашқы уақытта патрульдік полиция қызметкерлері ең алдымен жаңа ережелерді түсіндіріп, жүргізушілерге ескерту жасайтынын хабарлады.
