Қазақстанда WhatsApp мессенджеріндегі аккаунттарды бұзу жағдайлары күрт жиілеп кетті. Бұл алаяқтық схемасы хабарламаның бейтаныс адамнан емес, жәбірленуші сенетін жақын адамының нөмірінен келуімен өте қауіпті.
SHYNDYK.KZ хабарлағандай, алаяқтар аккаунтқа қол жеткізгеннен кейін оның иесінің туыстарына, достары мен әріптестеріне жаза бастайды. Әдетте олар шұғыл ақша керек екенін, бірдеңені тез арада төлеу қажеттігін немесе көрсетілген картаға белгілі бір соманы аударуды өтінеді.
Ішкі істер министрлігі аккаунттың бөтен адамдардың қолына түскенін күтпеуге кеңес береді. Мамандар WhatsApp желісінде екі сатылы тексеруді қосып, міндетті түрде PIN-код орнатуды ұсынады. Сондай-ақ оқтын-оқтын «Байланысқан құрылғылар» бөлімін ашып, бейтаныс қосылымдардың жоқтығын тексеріп тұрған жөн.
Егер сіздің атыңыздан өзіңіз жазбаған хабарламалар жіберілсе, себепсіз растау кодтары келе бастаса немесе WhatsApp кенеттен аккаунттан шығып кетсе, бірден сақ болу керек.
Егер аккаунт бұзылған жағдайда, мүмкіндігінше тезірек белгісіз құрылғыларды ажыратып, қауіпсіздік баптауларын өзгертіп, телефонды зиянды бағдарламаларға тексеру қажет. Сонымен қатар туыстар мен таныстарға ақша аудару туралы өтініштерге алданбауы үшін дереу ескерту маңызды.
Полиция қызметкерлерінің ең басты ережесі – ақша сұраған хабарлама ең жақын адамыңыздан келсе де, алдымен оған қоңырау шалыңыз. Тексеруге жұмсалған бірнеше секунд сізді қаражатыңыздан айырылудан сақтайды.
