Президент сөзінің басында Қырғызстанның ШЫҰ-ға табысты төрағалық еткенін ерекше атап өтті. Оның айтуынша, қырғыз тарапы ұйымның бірлігін нығайтуға және сан қырлы әлеуетін ашуға бағытталған мазмұнды жұмыс жүргізді.
«Бүгінгі отырыстың қорытындысы ШЫҰ-ның халықаралық беделін одан әрі арттырып, қызметінің тиімділігін күшейтуге ықпал ететініне сенімдімін», — деді Қасым-Жомарт Тоқаев.
Мемлекет басшысы өзара сенімді нығайту мен қауіпсіздік саласындағы ынтымақтастықты негізгі бағыттардың бірі ретінде атады. Президент ШЫҰ құрамында қалыптасып келе жатқан көпполярлы әлемдік тәртіпке елеулі ықпал ететін Еуразияның ірі мемлекеттері бар екеніне назар аударды.
Тоқаев Еуразия құрлығындағы стратегиялық тұрақтылық пен сенім шаралары жөніндегі ШЫҰ министрлік конференциясын өткізуді ұсынды. Оның күн тәртібіне әскери қатерлерді азайту, жаңа қарулану жарысын тежеу және қауіпті оқиғалардың алдын алу мәселелері енгізілуі мүмкін.
Президент қарулы қақтығыстардың салдары ұрыс жүріп жатқан аумақтың шегінен шығып, халықаралық нарықтарға, кеме қатынасына, энергетика мен көлік байланыстарына барған сайын көбірек әсер етіп жатқанын атап өтті.
Сонымен қатар трансұлттық қылмыспен, есірткі тасымалымен, заңсыз қару айналымымен және киберқауіптермен астасқан терроризм, экстремизм мен сепаратизм мәселелері де өзектілігін жоғалтқан жоқ.
Қазақстан қауіпсіздік саласындағы сын-қатерлерге қарсы іс-қимыл жөніндегі ШЫҰ әмбебап орталығын және ұйымның Есірткіге қарсы орталығын құруды қолдады. Бұл құрылымдар мүше мемлекеттердің құзырлы органдары арасындағы өзара іс-қимылды күшейтеді деп күтіліп отыр.
Тоқаев Еуразияның заманауи көлік-логистикалық қаңқасын қалыптастыруды тағы бір басым бағыт ретінде атады. Қазақстан «Бір белдеу, бір жол» бастамасын, Транскаспий халықаралық көлік бағытын, «Солтүстік — Оңтүстік» дәлізін және Орталық пен Оңтүстік Азия арасындағы перспективалы сауда жолдарын өзара ұштастыруды қолдайды.
Мемлекет басшысы ШЫҰ-ның бірыңғай цифрлық транзит платформасын құруды ұсынды. Ол жүкті жөнелту нүктесінен соңғы алушыға дейін бақылап, сүйемелдеуді қамтамасыз етуге тиіс.
Сонымен қатар Президент ШЫҰ-ның 2035 жылға дейінгі көлік байланысын дамыту стратегиясын әзірлеу бастамасын көтерді. Қазақстан кедендік рәсімдерді цифрландыруды, электронды құжаттарды өзара тануды және «жасыл дәліздерді» енгізуді де қолдайды.
Жасанды интеллект мәселесіне де ерекше назар аударылды. Тоқаевтың пікірінше, ШЫҰ елдері тәжірибе алмасудан технологияларды бірлесіп әзірлеуге және өздерінің жасанды интеллект экожүйесін қалыптастыруға көшуі қажет.
Президент ұйым аясында мүше мемлекеттердің жетекші университеттері, ғылыми мекемелері мен технологиялық компаниялары қатысатын жасанды интеллект орталықтарының желісін құруды ұсынды.
Қасым-Жомарт Тоқаев ШЫҰ-ны реформалау қажеттігін де айтып, сыртқы саяси ведомстволарға тиісті ұсыныстар әзірлеуді тапсыруды ұсынды.
Отырысқа Қырғызстан Президенті Садыр Жапаров, Беларусь Президенті Александр Лукашенко, Үндістан Премьер-министрі Нарендра Моди, Иран Президенті Масуд Пезешкиан, ҚХР Төрағасы Си Цзиньпин, Пәкістан Премьер-министрі Шахбаз Шариф, Ресей Президенті Владимир Путин, Тәжікстан Президенті Эмомали Рахмон және Өзбекстан Президенті Шавкат Мирзиёев қатысты.
Бішкекте өткен ШЫҰ-ға мүше мемлекеттер басшылары кеңесінің отырысы қорытындысында бірқатар құжатқа қол қойылды.
