Ынтымақтастықтың басым бағыттары ретінде Smart City жобаларын дамыту, көлік саласына цифрлық шешімдерді енгізу, сондай-ақ деректерді сақтауға және өңдеуге арналған инфрақұрылымды кеңейту мәселелері белгіленді.
Кездесуде Астана халықаралық әуежайын жаңғыртуға ерекше назар аударылды. Атап айтқанда, басқару тиімділігін арттыру, қауіпсіздікті күшейту және жолаушыларға көрсетілетін қызмет сапасын жақсарту үшін жасанды интеллект технологияларын пайдалану мүмкіндіктері қарастырылды.
Presight AI халықаралық G42 тобының құрамына кіреді және жасанды интеллект пен ауқымды деректерді талдау негізіндегі қолданбалы шешімдерді әзірлеумен айналысады. Компанияның қатысуымен елордада Astana Smart City жобасы іске асырылып, Alem.Cloud ұлттық суперкомпьютерлік инфрақұрылымы құрылды.
Бұған дейін Presight AI көлік қозғалысын болжауға, оқыс оқиғаларды анықтауға және қалалық инфрақұрылымды басқаруға арналған технологиялық шешімдерін таныстырған. Мұндай жүйелер қаладағы ахуалды жедел бағалауға, ықтимал мәселелерді ерте анықтауға және жауапты қызметтердің жұмысын үйлестіруге мүмкіндік береді.
Тараптар жасанды интеллектіні қала басқару жүйесіне енгізу мәселесін де талқылады. Бұл технологияларды ауқымды деректерді саралау, мемлекеттік және коммуналдық қызметтердің әрекет ету жеделдігін арттыру, сондай-ақ қоғамдық қауіпсіздік жүйелерін жетілдіру үшін қолдануға болады.
Олжас Бектенов Қазақстанның цифрлық трансформацияның жаңа кезеңіне көшіп жатқанын атап өтті. Премьер-министрдің сөзінше, 2026 жылдың Цифрландыру және жасанды интеллект жылы болып жариялануы аталған саланың ел дамуы үшін стратегиялық маңызын көрсетеді.
Үкімет басшысы инвесторларды қолдауға бағытталған шараларға да тоқталды. Қазақстанда салықтық және кедендік жеңілдіктер қарастырылған, Altyn Visa арнайы визалық режимі енгізіліп жатыр. Ал инвестициялық жобаларды сүйемелдеу «бір терезе» қағидаты бойынша жүзеге асырылады.
Томас Прамотедхам Presight AI компаниясының Қазақстандағы жұмысын кеңейтуге және жаңа жобаларды іске асыруға қатысуға дайын екенін жеткізді. Компания қолданбалы жасанды интеллект, цифрлық инфрақұрылым және экономиканың негізгі салаларына заманауи технологияларды енгізу бағыттарындағы ынтымақтастықты дамытуды көздеп отыр.
Келіссөз қорытындысында тараптар алдағы бірлескен жұмыстың басым бағыттарын айқындады. Бұл ретте отандық технологиялық құзыреттілікті арттыруға және білікті мамандар даярлауға ерекше мән берілмек.
