2026 жылдың шілде айында ҰҚК Шекара қызметі шекара аймағында заң бұзған 4 975 адамды ұстады, оның 4 346-сы шетел азаматтары, деп хабарлайды SHYNDYK.KZ.
Бір ай ішінде мемлекеттік шекара арқылы жалпы құны 3,9 миллиард теңгеден асатын тауарлар мен жүктерді заңсыз алып өтудің 2 476 әрекетінің жолы кесілді. Анықталған заң бұзушылықтар қатарында есірткі, қару-жарақ, оқ-дәрі, жанар-жағармай, халық тұтынатын тауарлар және валюта контрабандасы бар.
Бұдан бөлек, Каспий теңізінің акваториясында браконьерліктің 34 дерегіне тосқауыл қойылды. Жалпы ұзындығы 24,6 шақырым болатын ау мен 580 келіден астам бекіре тұқымдас балық тәркіленді. Алдын алынған шығын көлемі 251 миллион теңгеге бағаланып отыр.
Айдың қорытындысы бойынша Ұлттық қауіпсіздік комитеті 63 қылмыстық іс қозғап, 4 295 әкімшілік материал толтырды. Салынған айыппұлдың жалпы сомасы 38 миллион теңгеден асты.
