Қазақстанда алғашқы атом электр станциясын салу бойынша келісімшартқа қол қойылды. Құжатқа «Қазақстан атом электр станциялары» компаниясы мен «Росатомның» еншілес кәсіпорны «Атомстройэкспорт» қол қойды.
Келісімге Владивостокта өтіп жатқан Шығыс экономикалық форумы аясында қол қойылды. Іс-шараға Қазақстанның Атом энергиясы агенттігінің төрағасы Алмасадам Сәтқалиев пен «Росатом» бас директоры Алексей Лихачёв қатысты.
Келісімшарт нысанды жобалау, қажетті жабдықтарды жеткізу және АЭС құрылысын қамтиды. Оның жасалуы жобаны дайындық кезеңінен нақты іске асыру сатысына өткізеді.
Жұмыстарды жалғастыру үшін Қазақстан мен Ресей арасындағы үкіметаралық келісімде көзделген бірқатар рәсімдерден өту, соның ішінде Қазақстан Үкіметінің қажетті келісімдерін алу қажет.
АЭС құрылысы елдегі электр энергиясына сұраныстың өсуіне байланысты маңызды жобалардың бірі саналады. Электр тұтынудың артуына өнеркәсіп, инфрақұрылым, цифрландыру және жасанды интеллект салаларының дамуы әсер етіп отыр.
Жобаны жүзеге асыру кезінде қазақстандық кәсіпорындар мен мамандарды барынша тартуға басымдық берілмек. Бұл отандық өндірісті дамытуға, жаңа технологияларды енгізуге және атом энергетикасы саласындағы мамандардың біліктілігін арттыруға мүмкіндік береді.
Жоба ұзақ мерзімді перспективада Қазақстанның энергетикалық қауіпсіздігін күшейтіп, атом энергетикасының дамуына ықпал етуі тиіс.
