Платформа рейстердің коммерциялық тиімділігін бағалап, жаңа бағыттардың әлеуетін алдын ала анықтауға мүмкіндік береді.
Жүйе жолаушылар сұранысын, ықтимал транзиттік ағындарды және әуе қатынасын дамытудың келешегін саралайды. Алынған мәліметтердің негізінде маршруттық желіні модельдеп, жаңа рейстерді іске қосудың қаншалықты тиімді екенін бағалауға болады.
Аналитикалық модельді әзірлеу барысында мамандар әуе тасымалдаушыларының 170-ке жуық есебін және соңғы бес жылда орындалған 200 миллион рейс жөніндегі деректерді өңдеген.
Платформа өңірлердің макроэкономикалық көрсеткіштерін, халық санын, тұтынушылық талғамды және іскерлік белсенділік деңгейін де ескереді. Сондай-ақ жолаушылар ағынына ықпал етуі мүмкін ірі іс-шаралардың күнтізбесі есепке алынады.
Echelon Alpha компаниясының құрылтайшысы Рахман Асамбаевтың айтуынша, жүйе ашық және коммерциялық дереккөздермен қатар геомаркетингтік мәліметтерді пайдаланады.
«Платформаның болжам жасау дәлдігі 90 пайызға жетеді», – деді Рахман Асамбаев.
Жаңа жүйені әуе бағыттарын жоспарлау, қолданыстағы рейстердің тиімділігін бағалау және Қазақстанның транзиттік әлеуетін анықтау кезінде қолдануға болады. Сонымен бірге платформа жолаушылар арасында сұранысқа ие әрі әуе тасымалдаушылары үшін коммерциялық тұрғыдан тиімді болуы ықтимал бағыттарды айқындауға көмектеседі.
