Қазақстанда 2-9 тамыз аралығында 47 орман өрті тұтанды. Олардың бір бөлігі өңірлік орман шаруашылықтарына тиесілі учаскелерде, қалғаны мемлекеттік орман қоры аумағында болған.
Экология министрлігінің мәліметіне сүйенген SHYNDYK.KZ редакциясының хабарлауынша, 21 өрт жергілікті билік қарамағындағы орман шаруашылығы мекемелерінде тіркелсе, тағы 26 ошақ мемлекеттік орман қоры жерлерінен шыққан.
Тілсіз жауды жердегі және әуедегі патрульдеу жұмыстары кезінде анықтау мүмкін болды. Сонымен қатар, өрт енді ғана басталғанын байқауға мүмкіндік беретін арнайы жүйелер арқылы бақыланып отырды.
Өртті сөндіруге орман күзетінің қызметкерлері жұмылдырылды. Жағдайдың күрделілігіне қарай авиация мен «Қазавиаорманқорғау» мамандары да іске қосылды. Нәтижесінде мамандар барлық 47 өрттің бетін қайтарып, жалынның әрі қарай таралуына жол бермеді.
Өрт деректерінің көбеюіне байланысты мамандар ормандар мен демалыс орындарында отпен абай болу қажеттігін тағы да еске салады. Ыстық әрі құрғақ ауа райында сөндірілмеген алау немесе тасталған темекі тұқылының өзі үлкен апатқа әкеп соқтыруы әбден мүмкін.
