1 қыркүйектен бастап қазақстандық мектептер оқушылардың тамағы үшін есеп айырысудың жаңа, толық цифрландырылған форматына көшеді. Бұдан былай мердігерлерге қызмет ақысы «Әлеуметтік қор» ақпараттық жүйесіндегі расталған мәліметтер негізінде ғана төленеді.
Бұл жаңашылдық туралы үкімет отырысында Жасанды интеллект және цифрлық даму бірінші вице-министрі Ростислав Коняшкин мәлімдеді. Оның айтуынша, цифрлық платформа әлеуметтік қызмет көрсету процесін барынша ашық етеді және өзінің тиімділігін дәлелдеп үлгерген.
«Өткен 2025–2026 оқу жылында осы жүйе арқылы 149 миллион тегін ыстық тамақ беріліп, 1,6 миллион цифрлық ваучер іске қосылды. Биылдан бастап мектептердің тамақтандыру қызметі үшін төлемі тек расталған деректер бойынша ғана жүзеге асырылады», — деп атап өтті Ростислав Коняшкин.
Жобаны сәтті іске қосу үшін вице-министр 1 қыркүйекке дейін оқушылардың барлық тізімін жасақтауды аяқтап, жаңа оқу жылына мектептердің толық техникалық дайындығын қамтамасыз етуді тапсырды.
