Қостанай облысындағы «КайсарАгро» ЖШС алқабында ауыл шаруашылығы техникасы өртеніп кетті. Шаруашылық өкілінің айтуынша, бұл егін орағының алғашқы күні еді, ал ауа температурасы 40 градусқа жақындап тұрған.
SHYNDYK.KZ хабарлағандай, тілсіз жау комбайнның жоғарғы жағында, қозғалтқыш орналасқан тұста тұтанған. Жұмысшылар оны бірден өз бетінше сөндіруге тырысқанымен, жалын өте тез тараған. Шамамен бес минуттан кейін техника толығымен өртке оранған.
Дегенмен шаруашылықта ықтимал өрт қаупіне алдын ала дайындық жасалған. Әрбір техникада толық өрт сөндіргіш, 30 литрлік су ыдысы және өрт сөндіруге арналған құрал болған. Сонымен қатар егістік басында соқасы бар трактор мен сорғы орнатылған су тасушы көлік кезекшілікте тұрған.
Бірақ бұл жолы өрт сөндіргіштер еш көмектесе алмаған, өйткені өрт тым тез күш алған. Жалынның тұтануының нақты себебі әзірге белгісіз. Шаруашылық басшылығы бірнеше нұсқаны қарастырып жатыр, алайда түпкілікті қорытынды жасауға асықпайды.
Аптап ыстық жағдайды одан сайын қиындатқан. Егін жинау кезінде қураған шөп, жоғары температура және жұмыс істеп тұрған техника өрт қаупін арттырады. Кішкентай ғана ұшқын санаулы минуттар ішінде үлкен өртке ұласуы мүмкін.
Жарияланған кадрларға қарағанда, өрттің егістіктің үлкен аумағына таралуына жол берілмеген. Зардап шеккендер туралы ақпарат түскен жоқ. Қазіргі уақытта өрттің шығу себептері анықталып жатыр.
