Қазақстанның бұрынғы Ұлттық экономика министрі Қуандық Бишімбаевтың бұрынғы әйелі Назым Қаһарман өзіне қарсы жаңа сот шағымы түскенін хабарлады. Ол Instagram парақшасында жариялаған бейнежазбасында шағымды бұрынғы енесі түсіргенін айтты.
Қаһарманның айтуынша, бұл шамамен 25 миллион теңгені құрайтын қаржылық талап.
«Бұрынғы енемнен шамамен 25 миллион теңге көлемінде шағым түсті», – деді ол.
Ол бұл соңғы екі жыл ішінде бұрынғы күйеуінің отбасы тарапынан өзіне қарсы берілген төртінші шағым екенін атап өтті. Ал өзі осы уақыт аралығында сотқа тек бір рет – ата-ана құқығынан айыру туралы шағыммен ғана жүгінген.
«Бұл олардың тарапынан маған қарсы екі жыл ішінде түсірілген төртінші шағым, бірақ бұрынғы енемнен бірінші рет келіп отыр. Мен осы уақыт ішінде тек бір ғана шағым бердім, ол – ата-ана құқығынан айыру», – деді Қаһарман.
Бишімбаевтың бұрынғы әйелінің сөзінше, дау 2011 жылдан бері өзі басқарып келген фитнес-клубқа қатысты болып отыр. Ол екінші баласы дүниеге келгеннен кейін корпоративтік саладағы жұмысын тастап, сенімгерлік басқару шартымен отбасылық бизнеспен айналысқанын айтты.
Қаһарманның мәлімдеуінше, жылжымайтын мүлік бұрынғы күйеуінің емес, оның анасының атына жазылған.
«Бұрынғы күйеуім өз атына ештеңе рәсімдемейтін, бәрі анасының атына жазылды. Сол кезде маған олар өте адал адамдар болып көрінді және мен сенімгерлік басқару шартынан ешқандай жамандық көрмедім», – деді ол.
Енді арада жылдар өткен соң, дәл осы келісімшарт қаржылық талаптар қоюға негіз болған.
«Осыншама жыл өткеннен кейін менен ақша талап еткен шағым келіп түсті. Бұл нағыз тұзақ», – деді Қаһарман.
Сондай-ақ ол кәсіпкерлерге туыстармен бизнес жүргізуде абай болуға кеңес берді.
«Егер сіз енеңізбен, күйеуіңізбен немесе оның туыстарымен жұмыс істесеңіз, үлкен тәуекелдер бар екенін есте сақтаңыз. Тіпті азғантай сомаға болса да, жалға алу шартын жасасқан дұрыс», – деп санайды ол.
Қаһарманның пікірінше, бұл шағым бұрынғы енесі мен немерелерінің қарым-қатынасына да кері әсерін тигізген.
«Бұл жағдайдан кейін балалардың көңілі әбден қалған сияқты. Олардың жүрегі жараланды», – деді ол.
Оның сөзінше, бұл әрекеттердің астарында жеке өшпенділік жатыр.
«Ол мені қатты жек көреді. Өйткені мен кезінде оның өзі жасауы тиіс болған нәрсені істедім – ұлымды алып, оны мұндай өмірден құтқару үшін кетіп қалдым», – деді Қаһарман.
Сонымен қатар ол бұрынғы енесінің өз ұлымен енді ешқашан көріспеуі мүмкін екенін болжады. Оның айтуынша, бұл да жиналған ашу-ызаның бір себебі.
«Керемет болашақ орнамады. Ұлы түрмеде отыр, оны бұл өмірде қайта көруі екіталай. Енді тек бойындағы ашу мен заһарын шашып, өзімен араласқысы келмейтін немерелеріне тиісіп, бұрынғы келінінен кек алу ғана қалды», – деді ол.
Сөз соңында ол қарсы шағым түсіру мүмкіндігін қарастырып жатқанын жеткізді.
«Мүмкін, тепе-теңдік үшін мен де алиментке беретін шығармын, өйткені алимент келісімшартқа сәйкес толық төленген жоқ», – деді ол.
Ең өзекті және маңызды жаңалықтарды SHYNDYK.KZ сайтынан оқи аласыздар.
