Миллиондаған еуропалық тамашалаған сирек кездесетін астрономиялық құбылыс кейбір адамдар үшін дәрігердің қабылдауымен аяқталды. Тұтылудан кейін ауруханалар мен арнайы емханаларда көз саулығына алаңдаған тұрғындардың қарасы көбейген.
Әсіресе Испанияда жағдай ушығып тұр. Елдің бірнеше өңірінің өзінде 300-ден астам адам медициналық көмекке жүгінген. Мадридтегі ауруханалардың бірінде кешкі мезгілде офтальмологқа қаралушылар саны әдеттегі 6 адамнан 30-ға дейін бір-ақ өскен.
Дегенмен, пациенттердің басым көпшілігінде айтарлықтай қауіпті жарақаттар анықталмаған. Көпшілігі көздің қызаруына, құрғауына, қышуына немесе көзге құм кіріп кеткендей сезімнің пайда болуына шағымданған.
Ұлыбританияда да күн тұтылғаннан кейін көздің ауыруы мен жанардың зақымдануына қатысты ақпарат іздеушілер қатары артқан. Дәрігерлерге Күнге тым ұзақ қарап қойғаннан қауіптенген адамдар жүгінген.
Арнайы қорғаныш көзілдіріктерінің тапшылығы да бұл мәселенің ушығуына себеп болды. Тұтылу қарсаңында Еуропаның көптеген қалаларында оларды табу қиынға соққан. Сондықтан кейбір адамдар бұл құбылысты ешқандай қорғаныссыз немесе арнайы емес құралдарды пайдаланып тамашалаған.
Күнге тікелей қарау несімен қауіпті?
Ең басты қауіп – күн ретинопатиясы, яғни күннің қарқынды сәулеленуінен көз торының зақымдануы.
Мұның қауіптілігі сол, адам бастапқыда ештеңе сезбеуі мүмкін. Алғашқы айқын белгілер кейде бірнеше сағаттан кейін ғана білінеді.
Қауіпті симптомдардың қатарында:
Көздің бұлдырауы немесе көру қабілетінің бұрмалануы;
Көз алдында қара дақтың пайда болуы;
Жарыққа сезімталдықтың артуы;
Түстерді ажыратудың қиындауы.
Күннің тұтылуын бақылау үшін кәдімгі күннен қорғайтын көзілдіріктер жарамайды. Ол үшін арнайы сертификатталған қорғаныш сүзгілері қажет.
Дәрігерлер күннің тұтылуын арнайы қорғаныссыз тамашалап, кейін көру қабілетінің тұрақты түрде нашарлағанын байқаған жандарға міндетті түрде офтальмологқа қаралуға кеңес береді.
