Тиісті шешім жаңа бір палаталы Парламенттің алғашқы сессиясында қабылданды. «Қазақстан Республикасының Құрылтайы және оның депутаттарының мәртебесі туралы» Конституциялық заңға сәйкес тұрақты комитеттердің саны сегізден аспауға тиіс.
Комитеттердің құрамына депутаттық мандат алған бес саяси партияның өкілдері енді. Әрбір депутат бір ғана тұрақты комитетте жұмыс істей алады. Құрылтай төрағасы мен оның үш орынбасары комитеттер құрамына кірмейді.
Аграрлық мәселелер, экология және табиғи ресурстар комитетінің төрағасы болып Серік Егізбаев сайланды. Бұл — төрағасы парламенттік оппозиция атынан ұсынылған жалғыз комитет. Шешім парламенттік көпшілік пен оппозициялық партиялар фракцияларының басшылары арасындағы консультациялардан кейін қабылданды.
Комитет ауыл шаруашылығы, жер және су ресурстары, экология, қоршаған ортаны қорғау және табиғи ресурстарды ұтымды пайдалану мәселелерімен айналысады.
Конституциялық заңнама, сот жүйесі және құқық қорғау органдары комитетінің төрағасы болып Үнзила Шапақ сайланды. Комитеттің құзыретіне мемлекеттік басқару, заңнаманы жетілдіру, сот және құқық қорғау органдарының қызметі, сондай-ақ адам құқықтарын қорғау мәселелері кіреді.
Халықаралық істер, қорғаныс және қауіпсіздік комитетін Марат Қожаев басқаратын болды. Комитет мүшелері сыртқы саясат, халықаралық келісімдер, қорғаныс қабілеті, ұлттық қауіпсіздік және азаматтық қорғау мәселелерін қарайды.
Өңірлік және инфрақұрылымдық даму комитетінің төрағасы болып Амирбек Оспанбеков сайланды. Оның қызмет бағыттары өңірлерді дамыту, тұрғын үй-коммуналдық шаруашылық, көлік, құрылыс, инфрақұрылым және кәсіпкерліктің жекелеген мәселелерін қамтиды.
Әлеуметтік-мәдени даму комитетін Асхат Аймағамбетов басқарады. Комитет білім беру, денсаулық сақтау, әлеуметтік қорғау, мәдениет, жастар саясаты және қоғамды дамыту салаларындағы заң жобаларына жауап береді.
Қаржы және бюджет комитетінің төрағасы болып Ольга Перепечина сайланды. Комитет республикалық бюджет, салық саясаты, қаржы нарығы, мемлекеттік мүлік және мемлекет қаражатының пайдаланылуын бақылау мәселелерімен жұмыс істейді.
Цифрландыру, инновациялар және ғылым комитетін Дархан Ахмедиев басқаратын болды. Оның құзыретіне цифрлық трансформация, жасанды интеллект, байланыс, киберқауіпсіздік, инновациялар, ғылым және жоғары білім мәселелері енгізілді.
Экономикалық саясат, өнеркәсіп және энергетика комитетінің төрағасы болып Наталья Годунова сайланды. Комитет экономикалық реформалар, инвестициялық саясат, өнеркәсіп, энергетика және сауда салаларына қатысты мәселелерді қарайды.
Депутаттар төрағалармен бірге сегіз тұрақты комитеттің барлық мүшесін де сайлады. Дербес құрам парламентарийлердің өтініштері мен партиялық фракциялардың өкілдігі ескеріле отырып жасақталды. Комитеттердің хатшылары да белгіленді.
Тұрақты комитеттер Құрылтайдың негізгі жұмыс органдарына айналады. Олар заң жобалары бойынша қорытынды әзірлейді, депутаттар ұсынған түзетулерді жинақтайды және мемлекеттік органдардың, қоғамдық бірлестіктердің, бизнес өкілдерінің, ғалымдар мен салалық мамандардың қатысуымен жұмыс топтарын құрады.
Сонымен қатар комитеттер парламенттік тыңдауларды әзірлеуге қатысып, үкімет сағаттарын өткізе алады. Олардың отырыстары қажеттілігіне қарай, бірақ айына кемінде екі рет өткізілуге тиіс.
Комитеттердің құрылуы бірінші шақырылымдағы Құрылтайдың ішкі құрылымын қалыптастырудың негізгі кезеңдерінің бірін аяқтады. Бұған дейін заң шығарушы органның төрағасы болып Айбек Дадебай сайланған еді. Оның орынбасарлары қызметіне Нұрлан Бекназаров, Дания Еспаева және Динара Закиева сайланды.
