Мәскеуден Алматыға ұшып келген ресейлік азаматша Қазақстандағы алғашқы әсерімен бөлісіп, видео жариялады. Ол үшін басты жаңалық — тұрақты интернет пен әлеуметтік желілердегі шектеулердің жоқтығы болған.
SHYNDYK.KZ редакциясының мәліметінше, турист VPN қоспай-ақ қалыпты жұмыс істейтін Instagram мен таргетингтік жарнаманың қандай болатынын қайта есіне түсіргенін жасырмады. Оның сөзінше, бұл жағдай оған ерекше еркіндік пен шабыт сыйлаған, себебі енді бағдарламаларды қосып-өшіруге және жүйкені жұқартуға уақыт құртпайды.
«Мәскеудегідей ұялы байланыс істемейтін, WhatsApp пен Telegram жүктелмейтін ауыртпалық мұнда жоқ. Бұл жерде интернет ұшып тұр», — деді бойжеткен. Ол сондай-ақ ауа райының керемет екенін атап өтіп, бұл ешқандай көшуге үндейтін насихат емес, тек Алматыдағы үшінші күнінен алған шынайы әсері екенін атап өтті.
