Әлеуметтік желідегі кезекті пікір күтпеген жерден нақты жауапкершілікке әкеп соқты. 21 жастағы Нұрай Серікбайдың өліміне арналған жазбаның астында TikTok қолданушысы «72 рет пышақтар едім» деген сөз қалдырған.
Бұл пікірге марқұмның ағасы Сұлтан Серікбай назар аударған. Отбасы бұл жазбаны Нұрайдың рухын қорлау деп қабылдап, құқық қорғау органдарына шағым түсірді.
Реакция өте жылдам болды. С. Серікбайдың айтуынша, полицейлер аккаунт иесін шамамен он сағаттың ішінде анықтап үлгерген.
Оның авторы Шымкент қаласының 37 жастағы тұрғыны болып шықты. Полиция бөлімшесінде ер адам өз сөзінің қате түсінілгенін айтып ақталған.
Ол бұл сөзді Нұрайға қатысты айтпағанын мәлімдеді. Ер адамның нұсқасы бойынша, видеоның астында одан «қызға осыншама пышақ жарақатын салған адаммен не істер едің?» деп сұраған. Пікір авторы дәл осы сұраққа жауап беріп, 72 соққы туралы сөзді ықтимал кісі өлтірушіге қарата айтқанын алға тартты.
Ер адам марқұмның отбасынан кешірім сұрап, Нұрайдың жақындарына қосымша қайғы әкелу ниеті болмағанына сендірді. Сондай-ақ ол қылмысты және оны жасайтын адамдарды қолдамайтынын мәлімдеді.
Алайда бұл оқиға тек кешірім сұраумен аяқталған жоқ.
Шымкент қалалық Полиция департаменті ер адамның құқыққа қайшы контентті орналастырғаны және таратқаны үшін әкімшілік жауапкершілікке тартылғанын хабарлады. Оған 20 АЕК (86 500 теңге) көлемінде айыппұл салынды.
Бұдан бөлек, пікір авторымен профилактикалық түсіндіру жұмыстары жүргізіліп, заң талаптарын қатаң сақтау қажеттігі ескертілді.
Бұл жағдайдан кейін марқұмның ағасы Сұлтан Серікбай отбасының әлеуметтік желілердегі іске қатысты жазбалар мен талқылауларды мұқият қадағалап отырғанын жеткізді. Нұрай мен оның жақындарының атына айтылған қорлау және арандатушылық пікірлер тіркеліп, негіз болған жағдайда ақпарат құқық қорғау органдарына берілетін болады.
Бұл оқиға Шымкентте өтіп жатқан Нұрай Серікбайдың өліміне қатысты сот процесі аясында ерекше резонанс тудырды.
Ең өзекті және маңызды жаңалықтарды SHYNDYK.KZ сайтынан оқи аласыздар.
