Оралда Kia Optima көлігімен әдеттегідей жолға шығу полицияның араласуымен аяқталды. Көлік қозғалысы кезінде бала ашық люктен сыртқа басын шығарып алған.
Бұл ереже бұзушылық Жедел басқару орталығының камераларына түсіп қалған. Бейнежазба арқылы полицейлер көлікті, кейін оның тізгінінде отырған адамды анықтады.
Жүргізушіге жолаушыларды тасымалдау және қауіпсіздік белдіктерін пайдалануға қатысты Жол қозғалысы ережелерінің талаптарын сақтамағаны үшін тиісті шара қолданылды.
Полиция мұндай әрекеттердің аса қауіпті екеніне баса назар аудартты. Көлік қалыпты келе жатқанның өзінде, жолдағы жағдай санаулы секундтарда өзгеруі мүмкін. Кенеттен тежегішті басу, күтпеген маневр жасау немесе соқтығысу, әсіресе, өз орнында отырмаған және белдік тақпаған жолаушы үшін өте қауіпті.
Кәмелетке толмағандарды тасымалдау жауапкершілігі, ең алдымен, жүргізушінің мойнында екені ескертілді. Жолға шықпас бұрын ересек адам баланың салонда қауіпсіз отырғанына және ЖҚЕ талаптарына сай белдік таққанына көз жеткізуі тиіс.
Құқық қорғаушылар ата-аналарды қозғалыстағы көліктің терезесінен немесе люгінен балалардың сыртқа қарауына рұқсат бермеуге шақырды. Балаға ойын болып көрінгенмен, бұл жолда ауыр жарақат алуға әкеп соқтыратын нақты қауіп.
Бұл туралы SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
