Америкалық WTI маркалы мұнай 1,62 пайызға арзандап, барреліне 85,65 долларға түсті. Brent бағасы 1,45 пайызға төмендеп, 93,02 долларды құрады. Ал ресейлік Urals мұнайының құны 2,85 пайызға азайып, барреліне 86,32 долларға дейін төмендеді. SHYNDYK.KZ әлемдік нарықтағы соңғы көрсеткіштерді саралады.
Бағаның төмендеуі бірнеше сауда сессиясына созылған өсімнен кейін тіркелді. Бұған дейін мұнай құны Таяу Шығыстан шикізат жеткізіліміне қатысты қауіптің күшеюіне байланысты көтерілген еді. Ормуз бұғазы арқылы кеме қатынасы әлі де шектеулі күйінде қалып отыр, ал мұндағы қозғалыс қарқыны әдеттегі деңгейден едәуір төмен.
Сонымен қатар Тегеран Ирактың бірнеше мұнай танкеріне бұғаз арқылы өтуге рұқсат берді. Бұл шешім Бағдадтың өтінішінен кейін қабылданған. Дегенмен Ормуз бұғазындағы кеме қозғалысының толық қалпына келгені туралы әзірге ресми мәлімет жоқ.
Нарыққа ықпал еткен тағы бір жағдай – Харк аралындағы батыс терминалдың жұмысын қайта бастауы. Иранның мұнай инфрақұрылымындағы негізгі нысандардың бірі саналатын терминалда шикізат тиеу 25 күндік үзілістен кейін қайта жанданды.
Соған қарамастан мұнай нарығындағы белгісіздік толық сейілген жоқ. Тегеран мен Вашингтон арасындағы келіссөздер нақты нәтижесіз аяқталды. Сондықтан Иран төңірегіндегі ахуал мен Ормуз бұғазындағы жағдай алдағы уақытта да мұнай бағасына әсер ететін негізгі факторлардың бірі болып қала береді.
