Басылым мәліметінше, 46 жастағы Қорабоев тыңшылық жасады деген күдікке ілінген. Оның жақын туысының айтуынша, 3 шілде күні азаматтық киімдегі бірнеше адам профессордың Астанадағы үйіне келген.
Туысы сол адамдар Қорабоевқа тыңшылық жасады деген айып тағылғанын айтып, оны өздерімен бірге алып кеткенін мәлімдеді. Алайда оның қай мекемеге жеткізілгені және қазіргі уақытта қайда қамауда отырғаны туралы ақпарат берілмеген.
Икболжон Қорабоев – Өзбекстан азаматы, Әндіжан қаласының тумасы. Ол Астанада жұбайы және кәмелетке толмаған үш баласымен бірге тұрған.
BBC дерегіне сәйкес, профессорға Қазақстан Қылмыстық кодексінің 176-бабы бойынша күдік келтірілген. Аталған бап тыңшылық үшін қылмыстық жауапкершілікті көздейді.
Басылым бірнеше апта бойы Қазақстан мен Өзбекстанның мемлекеттік органдарынан, сондай-ақ Қорабоев жұмыс істеген университеттен түсініктеме алуға тырысқанын хабарлады. Алайда жолданған сауалдарға жауап келмеген.
Қорабоев аға ғылыми қызметкер болып жұмыс істейтін БҰҰ Университетінің Өңірлік интеграцияны салыстырмалы зерттеу институтында (UNU-CRIS) қалыптасқан жағдайға алаңдаушылық білдірген. Дегенмен мекеме ресми мәлімдеме таратқан жоқ.
SHYNDYK.KZ редакциясы Қазақстанның Ішкі істер министрлігіне, Бас прокуратурасына және Ұлттық қауіпсіздік комитетіне ресми сауалдар жолдады. Редакция мемлекеттік органдардың жауабын күтіп отыр.
Қорабоевқа қатысты мәліметтер әзірге ресми органдар тарапынан расталған жоқ. Оның кінәсі соттың заңды күшіне енген үкімімен ғана анықталуы мүмкін.
