Шымкентте өтіп жатқан сот отырысы барысында прокурор Шерхан Аймаханның жазасын жеңілдетуге ешқандай негіз жоқ екенін қатаң мәлімдеді.
SHYNDYK.KZ хабарлағандай, мемлекеттік айыптаушы соттан күдіктіні толық кінәлі деп танып, оған ең ауыр жаза – өмір бойына темір торға қамау үкімін шығаруды сұрады.
Еске сала кетейік, 21 жастағы Нұрай Серікбай биылғы жылдың қаңтар айында қатыгездікпен өлтірілген болатын. Тергеу мәліметтеріне сүйенсек, Аймахан бойжеткенді өз үйінің маңында аңдып тұрып, тұтқиылдан шабуыл жасаған. Қанды оқиғадан кейін екі тәулік өткен соң күдікті Шымкент қаласының маңында қолға түсті.
Бұл сұмдық қылмыс қоғамда үлкен наразылық пен резонанс тудырды. Ішкі істер министрлігі істі қатаң бақылауға алды. Оған қоса, кейінірек Шымкент қалалық полиция қызметкерлерінің үстінен қызметіне салғырт қарау дерегі бойынша да қылмыстық іс қозғалды.
Тергеу барысында Аймаханға арнайы психиатриялық сараптама тағайындалған еді. Сәуір айында ІІМ оның ақыл-есі дұрыс деп танылғанын ресми түрде мәлімдеді.
Барлық тергеу амалдары маусым айында толық аяқталып, іс материалдары сотқа жолданды. Енді Шерхан Аймаханның тағдырына қатысты түпкілікті шешімді сот қабылдайтын болады.
