Қазақстан мұсылмандары діни басқармасы 2027 жылға арналған діни күндер кестесін бекітті. Жарияланған күнтізбеге сәйкес, қасиетті Рамазан айы 8 ақпанда басталады, ал Құрбан айт 16–18 мамыр аралығына сәйкес келеді, деп хабарлайды SHYNDYK.KZ.
ҚМДБ ұсынған күнтізбеде мұсылман қауымы үшін маңызды діни күндер көрсетілген:
- 8 ақпан — Рамазан айының басталуы;
- 6 наурыз — Қадір түні;
- 9 наурыз — Ораза айт;
- 16–18 мамыр — Құрбан айт.
Рамазан — мұсылмандар үшін ораза ұстап, құлшылыққа ерекше көңіл бөлетін қасиетті ай. Оның аяқталуы Ораза айт мерекесімен жалғасады. Ал Құрбан айт кезінде мұсылмандар құрбандық шалып, мұқтаж жандарға көмек көрсетеді.
Діни басқарманың түсіндіруінше, һижри айлардың басталуы халықаралық астрономиялық зерттеу орталықтарының мәліметтері негізінде есептеледі. Алайда жаңа айдың көрінуіне байланысты діни мерекелердің күндері бір күн алға немесе кейін жылжуы мүмкін.
Сондықтан мұсылмандарға мереке күндері жақындағанда ҚМДБ-ның ресми хабарламаларын қадағалау ұсынылады.
