Әлеуметтік желіде тойда түсірілген видео тарады. Онда қонақтардың бірі тойда ішімдіктен бас тартқаннан кейін, енді музыкадан да бас тартып, ерлер мен әйелдерді бөлек отырғызу керектігін айтқан. Бұған қоса, ол әншілерді «шайтанның жаршысы» деп атаған.
Бұл видеоны әнші Роза Әлқожа желіде жариялап, айтылған сөздерге назар аударуға шақырған болатын.
Осыдан кейін жағдайға қатысты Қазақстан мұсылмандары діни басқармасы (ҚМДБ) пікір білдірді. Діни басқарма ислам діні адамгершілікке жатпайтын әндерді құптамайтынын, алайда өнер адамдарының барлығын жаппай кінәлауға болмайтынын атап өтті.
«Оған қоса, аналарымызды, қыздарымыз бен әйелдерді әдепсіз сөздермен қорлауды өрескел қателік деп санаймыз», – деп баса айтты ҚМДБ өкілдері.
Кейінірек Қазақстанның Ішкі істер министрлігі ресми мәлімдеме жасады. Ведомствоның хабарлауынша, әлеуметтік желілерге мониторинг жүргізу барысында Түркістан облысының 66 жастағы тұрғынының діни және әлеуметтік алауыздықты қоздыру белгілері бар жария мәлімдемелері бар бейнежазба анықталған. Аталған дерек бойынша қылмыстық іс қозғалды.
«Қазақстан Республикасының Конституциясы жынысына, тегіне, әлеуметтік жағдайына, дінге көзқарасына және өзге де жағдайларға қарамастан әркімнің құқықтары мен бостандықтарының теңдігіне кепілдік береді. Адамның қадір-қасиетін қорлауға, діни, әлеуметтік немесе өзге де белгілері бойынша кемсітуге бағытталған кез келген жария шақыруларға, сондай-ақ қоғамдық келісім мен бірлікті бұзатын әрекеттерге жол берілмейді», – деп атап өтті ведомство.
Сонымен қатар, ІІМ сөз бостандығы жауапкершіліктен босатпайтынын, ал заң бұзушылық белгілері бар кез келген жария мәлімдемелерге қатаң құқықтық баға берілетінін ескертті.
Қоғамдағы ең резонансты оқиғалардан хабардар болып, тек тексерілген ақпаратқа сеніңіз. Шындықты SHYNDYK.KZ-тен оқыңыз.
