Шығыс Қазақстан облысы Тарбағатай ауданы Ақжар ауылында қауіпті оқиға қайғылы жағдаймен аяқтала жаздады. Телемұнараның басына шығып кеткен екі баланы Төтенше жағдайлар министрлігінің қызметкері дер кезінде байқап үлгерген, деп хабарлайды SHYNDYK.KZ.
Тарбағатай ауданының Төтенше жағдайлар бөлімінің аға инженері Архат Нығмашев сол уақытта профилактикалық рейдке қатысып жүрген. Ауыл ішімен өтіп бара жатқан ол биікте тұрған екі баланы көзі шалып қалады.
Белгілі болғандай, балалар темір құрылғыға өз беттерінше өрмелеп шыққан, алайда кері түсу жолы әлдеқайда қиынға соққан. Олар ересектердің көмегінсіз төмен түсе алмайтындарын түсінген.
Оқиға орнына Тарбағатай ауданының учаскелік полиция инспекторы Диас Жұмаділов те келді. Архат Нығмашев мұнараға көтеріліп, балалардың жерге аман-есен түсуіне көмектесті. Ал полицей бұл уақытта құтқару жұмыстарына қолғабыс етті.
Балалардың дер кезінде байқалуының арқасында оқиғадан ешкім зардап шеккен жоқ.
Осы жағдайдан кейін ТЖМ ата-аналардан балаларының қайда жүргенін бақылауды және оларға мұндай «шытырман оқиғалардың» қауіптілігін міндетті түрде түсіндіруді сұрап, қайта үндеу жасады. Қараусыз қалған ғимараттар, мұнаралар, құрылыс алаңдары және басқа да биік нысандар балаларға ойнауға қызықты жер болып көрінуі мүмкін, алайда биіктіктегі бір ғана абайсыз қимыл ауыр салдарға әкеп соқтыруы ықтимал.
Төтенше жағдай туындаған кезде 112 нөміріне қоңырау шалу қажет.
Ең өзекті және маңызды жаңалықтарды SHYNDYK.KZ сайтынан оқи аласыздар.
