Қазақстан Президенті Қасым-Жомарт Тоқаев Пешавар қаласындағы мектеп ғимаратының шатыры ортасына түсуі салдарынан көптеген адамның қаза болуына байланысты Пәкістан Ислам Республикасының Премьер-министрі Шахбаз Шарифке көңіл айту жеделхатын жолдады, деп хабарлайды SHYNDYK.KZ. Мемлекет басшысы бауырлас Пәкістан халқына ортақтасып, барлық зардап шеккендердің тезірек сауығып кетуін тіледі.
Жаңартылған мәліметтерге сәйкес, елдің солтүстік-батысындағы Хайбер-Пахтунхва провинциясының әкімшілік орталығында болған қайғылы апаттан кем дегенде 34 бала мен бір мұғалім көз жұмған. Қаза тапқан оқушылардың 12-сі — қыз бала. Тағы 50-ден астам адам түрлі жарақат алса, үш баланың жағдайы өте ауыр деп бағалануда.
Алдын ала ақпарат бойынша, сабақ өтіп жатқан сыныптың үстіне шатыр құлап, ғимараттың екі қабатын бірдей басып қалған. Төтенше жағдайлар қызметінің үйінділерді тазарту және құтқару операциясы төрт сағатқа жуық уақытқа созылды. Құтқарушылар үйінді астында қалған барлық тірі адамдарды алып шығуға қол жеткізді.
