Мемлекет басшылары Қазақстан мен Ресей арасындағы қарым-қатынастың дамуын талқылап, саяси, сауда-экономикалық, инвестициялық және гуманитарлық салалардағы ынтымақтастықтың қарқынды дамып келе жатқанын атап өтті.
Владимир Путин Қасым-Жомарт Тоқаевты Құрылтай сайлауының табысты өтуімен құттықтады. Оның айтуынша, дауыс беру нәтижесі Қазақстан Президентінің елді одан әрі дамытуға, ішкі саяси тұрақтылықты нығайтуға, экономиканы өркендетуге және халықтың тұрмыс деңгейін арттыруға бағытталған бағытын қолдайтынын көрсетті.
Қасым-Жомарт Тоқаев Ресей басшысына құттықтауы үшін алғыс айтып, конституциялық реформаның жүзеге асырылуы туралы баяндады. Президент Қазақстанды жаңғырту үдерісі ұлттық мүдде мен қоғам сұранысы ескеріле отырып жалғасатынын атап өтті.
«Реформа үшін реформа жүргізуге әсте болмайды. Ең алдымен азаматтарымыздың мүддесін басшылыққа алу қажет», — деді Қасым-Жомарт Тоқаев.
Мемлекет басшысы мамыр айында Владимир Путиннің Астанаға жасаған мемлекеттік сапарының маңызына да тоқталды. Оның сөзінше, Қазақстан Үкіметі қол жеткізілген уағдаластықтар мен қол қойылған келісімдерді жүзеге асырумен айналысып жатыр.
Тоқаев өзара сауда көлемінің өскеніне назар аударып, Ресей Қазақстанның негізгі инвестициялық және сауда серіктестерінің бірі болып қала беретініне сенім білдірді.
Владимир Путин өз кезегінде екіжақты байланыстардың дамуына оң баға берді. Ол елдер арасындағы тауар айналымы ұлғайып келе жатқанын, ал үкіметаралық комиссия қол жеткізілген уағдаластықтарды орындау бағытында белсенді жұмыс істеп жатқанын айтты.
Ресей Президенті гуманитарлық ынтымақтастыққа ерекше назар аударды. Оның мәліметінше, Ресейдің жоғары оқу орындарында Қазақстаннан барған 60 мыңға жуық студент білім алып жүр. Сонымен қатар жуырда Омбы қаласында Қазақстандағы жетекші жоғары оқу орындарының бірінің филиалы жұмысын бастады.
Кездесу барысында тараптар сауда-экономикалық және инвестициялық ықпалдастықты кеңейту, сондай-ақ өзара мүдделі салалардағы бірлескен жобаларды жүзеге асыру перспективаларын талқылады.
Президенттер халықаралық және өңірлік күн тәртібіндегі өзекті мәселелер жөнінде де пікір алмасты.
