Түркияда орман өрті бірнеше елді мекенге таралып, тұрғын үйлер мен ауыл шаруашылығы нысандарына қауіп төндірді. Билік бірқатар жолды жауып, тұрғындарды қауіпсіз жерге көшіруді бастады. Үш адам зардап шегіп, ауруханаға жеткізілді.
Антальяның Аксу ауданында шыққан өрт қатты желдің әсерінен тез таралған. Жалын тұрғын үйлерге дейін жетіп, бірнеше нысанға зақым келді.
Өртті сөндіруге 866 құтқарушы, 110 өрт сөндіру автоцистернасы, төрт ауыр техника, үш ұшақ және тоғыз тікұшақ жұмылдырылды.
Өрт аумағының ұлғаюына байланысты билік Солтүстік айналма жолды және Анталья – Ыспарта тасжолының бір бөлігін көлік қозғалысы үшін жапты.
Сонымен қатар өрт жетуі мүмкін аудандардан тұрғындарды эвакуациялау басталды.
Серик ауданында бес үй өртеніп, жылыжайлар мен ауыл шаруашылығы алқаптарына зақым келген. Үш адам зардап шегіп, медициналық көмек алу үшін ауруханаға жеткізілді.
Өрттен шыққан түтін Анталья әуежайынан да көрініп тұр. Өрт ошағы туристер арасында танымал Лара ауданындағы қонақүйлерден шамамен 15–20 шақырым жерде орналасқан.
Қазір өрттің шығу себебі анықталып жатыр.
