АҚШ вице-президенті Джей Ди Вэнс Украина басшылығына Каспий құбыр консорциумы (КТК) арқылы экспортталатын қазақстандық мұнай тасымалдайтын танкерлерге соққы беруді тоқтатуды өтінді.
Financial Times басылымының мәліметінше, бұл мәселені Вэнс 31 шілдеде Украина президенті Владимир Зеленскиймен болған телефон әңгімесінде арнайы көтерген. Вашингтон Қара теңіздегі шабуылдардың Қазақстан мұнайы тиелген кемелерге қауіп төндіріп, әлемдік мұнай нарығына, сонымен қатар ірі америкалық компаниялардың мүддесіне зиянын тигізуінен қауіптенген.
Әңгіме Новороссийск маңындағы КТК теңіз терминалында жүктелетін танкерлер жайында болып отыр. Қазақстанның мұнай экспортының едәуір бөлігі дәл осы бағыт арқылы жүзеге асырылады. Бұл жағдай америкалық бизнес үшін де аса маңызды: Chevron мен ExxonMobil компаниялары Қазақстандағы ірі мұнай жобаларына қатысып, КТК-да өз үлестеріне ие.
Америкалық тараптың өтінішінен кейін Киев КТК инфрақұрылымы мен ресейлік емес кемелерге, егер олар Украинаның санкциясы астында болмаса және ресейлік мұнай тасымалдамаса, шабуыл жасамауға келісті. Financial Times хабарлағандай, Вэнс пен Зеленскийдің әңгімесінен кейін КТК терминалы маңындағы танкерлерге жасалған шабуылдар тіркелмеген. Дегенмен, Украина Ресейдің басқа да энергетикалық нысандарына соққы беруін жалғастыруда.
