1 тамызға қараған түні Тұрар Рысқұлов ауданындағы Луговое ауылында 25 жастағы Ахмет Дүкенбай өлтірілді, деп хабарлайды SHYNDYK.KZ. Туыстарының айтуынша, оның үйінің жанында төрт-бес рет оқ атылған. Ер адам ауыр жағдайда ауруханаға жеткізілгенімен, дәрігерлер оның өмірін сақтап қала алмады.
Жақындарының айтуынша, қайғылы оқиғаға дейін Ахметке бірнеше рет қоқан-лоқы көрсетілген. Жұбайының сөзінше, кісі өлтірер алдында ол белгісіз адамдармен жанжалдасып қалғанын айтып, балаларға мұқият болуды өтінген. Туыстары қылмысқа басқа да адамдардың қатысы болуы мүмкін деп санайды және бұл нұсқаны мұқият тексеруді талап етіп отыр.
Қайғылы оқиғадан кейін Ахмет Дүкенбайдың отбасы, сондай-ақ әлеуметтік желінің көптеген қолданушылары Қазақстан Президенті Қасым-Жомарт Тоқаевқа үндеу жасап, тергеуді жеке бақылауына алуды сұрады. Олар спортшыға жасалған қоқан-лоқы туралы ақпаратты тексеруді, қылмысқа қатысы бар барлық адамды анықтауды және объективті тергеуді қамтамасыз етуді өтінеді.
Жақындарының айтуынша, олар оқиғаның мән-жайы туралы әлі күнге дейін толық түсініктеме алған жоқ және кінәлілердің бәрі бірдей жауапқа тартылмай ма деп қауіптенеді. Сонымен қатар, отбасы өздеріне мемлекеттік күзет беруді сұрап отыр. Марқұмның артында әйелі, кішкентай балалары және жалғыз ұлынан айырылған қарт ата-анасы қалды.
Жамбыл облысының полиция департаменті кісі өлтіру дерегі бойынша ҚР Қылмыстық кодексінің 99-бабымен сотқа дейінгі тергеу басталғанын хабарлады.
«Полиция қызметкерлері күдіктіні анықтап, уақытша ұстау изоляторына қамады. Қазіргі уақытта қылмыстық істі жан-жақты, толық және объективті тергеуге бағытталған қажетті тергеу әрекеттері жүргізіліп жатыр», – деп хабарлады ведомство.
Полиция басқа ешқандай мәлімет берген жоқ.
