Премьер-министрдің бірінші орынбасары қызметіне Нұрлыбек Нәлібаев тағайындалды. Ол мемлекеттік саясаттың негізгі бағыттары бойынша Үкімет жұмысын үйлестірумен айналысады.
Қанат Бозымбаев Премьер-министрдің орынбасары болды. Ал Ғалымжан Қойшыбаев Премьер-министрдің орынбасары — Үкімет Аппаратының басшысы қызметіне тағайындалды.
Экономикалық блокты Премьер-министрдің орынбасары — ұлттық экономика министрі болып тағайындалған Серік Жұманғарин үйлестіруді жалғастырады. Оның құзыретіне экономикалық саясат, мемлекеттік жоспарлау, кәсіпкерлік пен өңірлерді дамыту мәселелері кіреді.
Жаслан Мәдиев те Премьер-министрдің орынбасары қызметіне тағайындалып, бір мезгілде Жасанды интеллект және цифрлық даму министрлігін басқарды. Ведомство цифрлық трансформацияға, жасанды интеллектіні, телекоммуникацияларды, мемлекеттік онлайн қызметтер мен IT саласын дамытуға жауап береді.
Қаржы министрі қызметіне Мәди Такиев тағайындалды. Министрліктің міндетіне мемлекеттік бюджетті орындау, салық және кеден саясатын жүргізу, мемлекеттік сатып алу мен қаржылық бақылауды қамтамасыз ету кіреді.
Көлік министрлігін Нұрлан Сауранбаев басқарады. Ол автомобиль және теміржол инфрақұрылымын, азаматтық авиацияны, су көлігін және халықаралық транзиттік бағыттарды дамыту мәселелерін үйлестіреді.
Энергетика министрі болып Ерлан Ақкенженов тағайындалды. Ведомство электр энергетикасы мен мұнай-газ саласын дамытуға, сондай-ақ елдің энергетикалық инфрақұрылымының тұрақты жұмысын қамтамасыз етуге жауапты.
Төтенше жағдайлар министрлігінің басшысы қызметіне Мұрат Мұханов келді. Министрліктің құзыретіне төтенше жағдайлардың алдын алу және салдарын жою, азаматтық қорғаныс пен өрт қауіпсіздігін қамтамасыз ету кіреді.
Сонымен қатар Ерлан Сәрсембаев әділет министрі болып тағайындалды. Министрлік мемлекет қызметін құқықтық қамтамасыз етумен, нормативтік құқықтық актілерді тіркеумен, сондай-ақ нотариат, адвокатура және сот орындаушыларының жұмысын реттеумен айналысады.
Кадрлық өзгерістер күштік блокты да қамтыды. Қорғаныс министрі қызметіне Дәурен Қосанов тағайындалса, Ішкі істер министрлігін Ержан Саденов басқарады.
Тағайындау туралы Жарлықтар қол қойылған күннен бастап күшіне енеді. Үкімет құрамын қалыптастыру жалғасып жатыр. Жаңа кадрлық шешімдер жарияланған сайын материал жаңартылып отырады.
