Тергеу нұсқасына сәйкес, қарыз алушылар әлеуметтік желілерде тиімді шарттармен несие ұсынылған жарнама арқылы тартылған. Несие рәсімдеу үшін жеке басын растау, дербес мәліметтерін ұсыну және электрондық құжаттарға қол қою талап етілген.
ҚМА мәліметінше, рәсімдер аяқталғаннан кейін несие шарттары айтарлықтай өзгерген. Клиенттерге бастапқыда көрсетілген сомадан әлдеқайда аз ақша аударылған. Қаражаттың бір бөлігі қарыз алушыларға алдын ала айтылмаған комиссиялар мен басқа төлемдер ретінде ұсталған.
Сондай-ақ келісім жасалғанға дейін клиенттерге несиенің толық құны, артық төлем мөлшері, сыйақы мен ықтимал айыппұлдар туралы толық ақпарат берілмеген.
Қарызды қайтару үшін үшінші тұлғалардың, яғни дропперлердің банк карталары пайдаланылған. Сайттың жұмысы мен клиенттермен байланыс заңды тұлғалар, телекоммуникациялық ресурстар және техникалық жабдықтардан тұратын тармақталған инфрақұрылым арқылы жүзеге асырылған.
Тінту кезінде ҚМА қызметкерлері хабарламаларды жаппай тарату үшін пайдаланылған болуы мүмкін SIM-бокстар мен көп мөлшердегі SIM-карталарды тәркіледі.
Тергеу жалғасып жатыр. Қылмыстық-процестік кодекстің 201-бабына сәйкес өзге ақпарат жарияланбайды.
