Халықаралық іздеуде жүрген Азамат Қәпеновті Қазақстанға қайтару мәселесі әлі де белгісіз күйде қалып отыр. Бұған дейін SHYNDYK.KZ редакциясы Қырғыз Республикасының Бас прокуратурасына Қырғызстан аумағында жасырынып жүрген Қәпеновті экстрадициялау мәселесі қарастырылып жатқан-жатпағанын хабарлауды сұрап, ресми сауал жолдаған болатын. Алайда қадағалау органынан әзірге ешқандай жауап түскен жоқ.
Бішкектің үнсіздігі ұзаққа созылған тұста бұл істе жаңа мән-жайлар пайда болды: Қәпеновтің жеке парақшаларындағы барлық жазбалар кенеттен өшіріліп, оның медиадағы белсенділігі күрт төмендеген, тіпті байланысқа шығуды мүлдем тоқтатқан.
Еске сала кетейік, Кәрім Мәсімовтің бұрынғы күйеубаласы, «ҚазТемірТранс» АҚ экс-вице-президенті Азамат Қәпеновке қазақстандық құқық қорғау органдары іздеу жариялаған. ҚР Қаржылық мониторинг агенттігінің мәліметінше, ол өзінің қызметтік жағдайын пайдалана отырып, жүк вагондарымен жұмыс істеу кезінде үлестес компанияларға заңсыз артықшылықтар беріп, мемлекетке 5,2 миллиард теңгеден астам шығын келтірген. Сот оны сырттай қамауға алуға санкция берді, сондай-ақ оған қатысты Ресейде де параллельді түрде қылмыстық қудалау жүргізілуде.
Соңғы уақытқа дейін Қәпенов көпшілікке арналған бейнеүндеулер жазып, өзіне тағылған айыптарды жоққа шығару арқылы ақпараттық науқан жүргізуге тырысқан. Дегенмен барлық жазбалардың күрт жойылуы және әлеуметтік желілердегі парақшаларының толық өшірілуі жағдайдың бұдан былай қалай өрбитініне қатысты көптеген сұрақтар туындатып отыр.
SHYNDYK.KZ редакциясы оқиғаның дамуын бақылауды жалғастырады және Қырғыз Республикасының Бас прокуратурасынан ресми түсініктеме күтеді.
