Shoqan брендінің жарнамасына қатысты оқиға жалғасын тапты. Ерлер киімі брендінің негізін қалаушы Ұлықбек Шәріпов бейнеүндеу жариялап, әлеуметтік желілерде үлкен наразылық тудырған ролик үшін алғаш рет көпшілік алдында кешірім сұрады.
Кәсіпкер өз үндеуін қазақ тілінде жасады. Ол өзінің Тараз тумасы екенін айтып, жанжал басталған сәтте неліктен бірден пікір білдірмегенін түсіндірді. Оның айтуынша, ол алғашқы эмоциялардың басылуын күтіп, содан кейін ғана өз ойын байыппен жеткізуді жөн көрген. Шәріпов бұл жарияланым үшін жауапкершілікті толығымен өз мойнына алды, өйткені бейнеролик өзі құрған брендтің атынан шыққан. Бұл жолы ол тек түсініктеме берумен шектелмей, халықтан тікелей кешірім сұрады.
Даудың басына осыдан бірнеше ай бұрын түсірілген Shoqan жарнамалық ролигі себеп болған еді. Ондағы басты кейіпкер Саша Барон Коэннің фильмдеріндегі ойдан шығарылған қазақстандық журналист – Бораттың бейнесін сомдаған. Бастапқыда бұл видео аса назарға ілінбегенімен, жаз мезгілінде ролик Threads желісінде таралып, қызу талқыға түскеннен кейін жағдай күрт өзгеріп, оқиға басқа да әлеуметтік желілерге тез таралып кетті.
Көптеген қазақстандықтарға мұндай жарнамалық идея ұнамады. Желі қолданушылары Борат бейнесі Қазақстан мен оның тұрғындарын келеке етіп көрсететіндіктен, көп жылдар бойы ел ішінде дау тудырып келе жатқанын еске салды. Сондықтан отандық компанияның бұл кейіпкерді пайдалануын аудиторияның бір бөлігі өте ауыр қабылдап, желіде Shoqan өнімдерінен бас тартуға (бойкот) шақырған пікірлер көбейді. Көп ұзамай ролик компания парақшасынан өшірілді.
Сол кезде бренд өкілдері қазақстандықтардың ұлттық намысына тиюді немесе мәдениеті мен тіліне құрметсіздік танытуды көздемегенін алға тартып, түсініктеме берген еді. Алайда бұл сын толқынын тоқтата алмады. Жағдайды Шәріповтің алғашқы реакциясы одан әрі ушықтырып жіберді. Ол жарияланымның қателік болғанын мойындап, компания тиісті қорытынды жасағанын хабарлағанымен, сонымен қатар сын мен буллингтің (травля) аражігі туралы сөз қозғаған болатын. Қолданушылар ең алдымен нақты кешірім күткен еді, ал буллинг туралы сөздерді брендтің өз қателігінен назарды наразы аудиторияның мінез-құлқына аудару әрекеті ретінде қабылдады. Осыдан кейін Шәріпов екі аптаға жуық уақыт бойы бұл тақырыпқа қайта оралмады.
Енді міне, оның үндеуінің сарыны өзгерді. Shoqan негізін қалаушы компания басшысы ретінде болған оқиғаға толық жауапты екенін мойындап, халыққа жарнама идеясын ақтау үшін емес, шынайы кешірім сұрау үшін шықты.
Осылайша, бір ғана жарнамалық роликтен басталған оқиға бірнеше айдан кейін белгілі қазақстандық бренд үшін елеулі репутациялық дағдарысқа айналды. Ал ерекше тәсілмен назар аударту әрекеті ақырында бренд негізін қалаушының аудитория алдында жеке өзі жауап беріп, көпшіліктен кешірім сұрауына әкеп соқты.
