Президенттің айтуынша, Қазақстан мұғалім беделін арттыру көрсеткіші бойынша әлемде екінші орынға шыққан. Елде білім қызметкерлерінің құқықтық және әлеуметтік кепілдіктерін күшейту жұмысы жалғасып жатыр.
Бұл бағыттағы маңызды қадамдардың бірі – «Педагог мәртебесі туралы» Заңның қабылдануы. Сондай-ақ 5 қазан ресми түрде Мұғалімдер күні болып бекітілді.
Мемлекеттік наградалар тізбесіне «Қазақстанның еңбек сіңірген ұстазы» құрметті атағы да енгізілді. Бүгінде бұл атаққа 100-ге жуық педагог ие болған.
Қасым-Жомарт Тоқаев соңғы үш жылда үш мұғалімге жоғары мемлекеттік награда – «Қазақстанның Еңбек Ері» атағы берілгенін атап өтті.
Педагогтердің өз мамандығына көзқарасы TALIS-2024 халықаралық зерттеуінің нәтижелерінен де көрінеді. Зерттеу мәліметіне сәйкес, Қазақстан мұғалімдердің еңбекақыға қанағаттану деңгейі бойынша әлемдегі үздік бес елдің қатарына кірген.
Сауалнамаға қатысқан білім қызметкерлерінің 95 пайызы өз мамандығына көңілі толатынын айтқан. Ал 80 пайызы қайта таңдау мүмкіндігі берілсе, мұғалім мамандығын тағы да таңдайтынын жеткізген.
Педагог мәртебесін көтерумен қатар мемлекет мектеп инфрақұрылымын дамытуға да басымдық беріп отыр. Соңғы бес жылда Қазақстанда бір миллионнан астам оқушы орнына арналған 1120 мектеп салынды.
Жеті жыл ішінде білім саласын қаржыландыру көлемі үш есе өсіп, 6,4 трлн теңгеге жетті. Бөлінген қаражат жаңа оқу орындарын салумен қатар жұмыс істеп тұрған мектептерді жаңғыртуға бағытталды.
Осы кезеңде ауылдағы бес мыңнан астам мектептің материалдық-техникалық базасы жақсартылды. Білім беру ұйымдарында жеті мыңнан астам заманауи пән кабинеті жабдықталды.
Президент «Келешек мектептері» ұлттық жобасының жүзеге асырылуына да тоқталды. Екі жыл ішінде жоба аясында 460 мың оқушыға арналған 217 мектеп салынған.
Қасым-Жомарт Тоқаев барлық өңірде заманауи білім ошақтарын салуды жалғастыруды тапсырды. Оқушы орны тапшы аудандарға ерекше назар аударылуға тиіс. Мемлекет басшысы келесі жылдан бастап та мектеп құрылысының жоғары қарқынын сақтау қажет екенін айтты.
Инфрақұрылымды дамытумен қатар Президент педагогтерге артық салмақ түсіретін кейбір рәсімдерді қайта қарауға шақырды. Соның бірі – мұғалімдерді аттестаттау жүйесі.
Қасым-Жомарт Тоқаевтың айтуынша, педагогтер аттестаттау кезіндегі шамадан тыс жүктеме мен бюрократиялық кедергілерге шағымданып жүр. Бұл ретте кәсіби білімді бағалаудан бас тарту да, рәсімді одан әрі күрделендіру де көзделмейді.
Президент аттестаттау жүйесі түсінікті, ашық әрі объективті болуға тиіс екенін атап өтті. Бейінді министрлікке мәселені жан-жақты зерделеп, талаптарды оңтайландыру жөніндегі нақты ұсыныстарды қысқа мерзімде әзірлеу тапсырылды.
Мемлекет басшысы білім саласында өзгеріс енгізу үшін ғана реформа жүргізуге болмайтынын айтты. Әр бастаманың тиімділігі мен ықтимал салдары алдын ала мұқият саралануға тиіс. Жаңа талаптар педагогтер үшін қосымша күйзеліс пен жүктеменің көзіне айналмауы керек.
Қасым-Жомарт Тоқаев жаңа буын мұғалімдерін даярлауды тағы бір маңызды бағыт ретінде атады. Жауапты министрліктерге күш біріктіріп, жас мамандарды мектептер мен балабақшалардағы практикалық жұмысқа бейімдеудің бірыңғай жүйесін құру тапсырылды.
Сонымен қатар Президент педагогтердің біліктілігін арттыру бағдарламаларына жаңа Конституцияның құндылықтарын, сондай-ақ «Адал азамат», «Таза Қазақстан» және «Заң және тәртіп» тұжырымдамаларының идеяларын енгізуді ұсынды.
